Հալեպին սպառնացող ահաբեկիչները կջախջախվեն. Սիրիայի պաշտպանության նախարար

Սիրիական բանակի հրամանատարությունը «լի է վճռականությամբ՝ կատարելու Հալեպ քաղաքի անվտանգության ապահովման խնդիրը»: Այդ մասին օգոստոսի 10-ին հայտարարել է Սիրիայի զինված ուժերի գլխավոր հրամանատարի տեղակալ, պաշտպանության նախարար գեներալ Ֆահդ Ջասեմ ալ Ֆրեյջը: Ինչպես տեղեկացնում է SANA լրատվական գործակալությանը, նախագահ Բաշար Ասադի հանձնարարությամբ նա ստուգել է Հալեպը պաշտպանող սիրիական զորքերի մարտական պատրաստությունը:

Ռազմական գերատեսչության ղեկավարն օգոստոսի 10-ին անձամբ է ծանոթացել հարավային եւ հարավարեւմտյան ռազմաճակատներում ստեղծված իրադրությանը, որտեղ ելուզակախմբերը գրոհել են կառավարական ուժերի դիրքերը:

«Սիրիայի բոլոր զավակները հույսով ու վստահությամբ են հետեւում փառապանծ զորքերին, որոնք մարտնչում են Հալեպի պատերի մոտ»,-ասել է գեներալ ալ Ֆրեյջը: Նրա խոսքով՝ «ահաբեկիչների ելուզակախմբերը կջախջախվեն, եւ նրանց պլանները կձախողվեն»:

Սիրիայի ռազմաօդային ուժերը եւ հրետանին հակառակորդի դիրքերին հարվածներ են հասցնում Հալեպի մատույցներում: Քաղաքի ներսում կրակի տակ են առնվում Քադի-Ասքար, Սալիհին, Քաթարջի եւ Շեյխ-Սայիդ թաղամասերում զինյալների կուտակումներին, «Ջեյշ ալ Ֆաթհ» զինված կոալիցիայի կազմավորումներն զգալի կորուստներ են կրում: SANA-ի տեղեկությունների համաձայն՝ շարքից դուրս են տասնյակ միավոր զրահատեխնիկա եւ բազմաթիվ արտաճանապարհային մեքենաներ՝ գնդացիրներով: Օդուժը գրոհում է նաեւ Խան-Թոումանում, էզ-Զորբեում, Հալսում, Դարեթ Իզեում եւ Աթարիբում զինյալների թիկունքային դիրքերի վրա, հաղորդել է ՏԱՍՍ-ը: