Ադրբեջանի պետական նավթային ընկերությունում նավթի արդյունահանման ծավալը 9 տոկոսով նվազել է

Ադրբեջանի պետական նավթային ընկերության' SOCAR-ի նավթի արդյուհանման ծավալը 2016 թվականի հունվար-հուլիս ամիսներին, անցյալ տարվա նույն ժամանակաշրջանի համեմատ, 8,7 տոկոսի նվազում է արձանագրել:

Ինչպես հաղորդում է «Արմենպրես»-ը, «Ազադլըգ» թերթը գրում է, որ ընթացիկ տարվա հունվար-հուլիս ամիսներին արդյունահանած 4 420,7 մլն տոննա նավթի 639 հազար տոննա մասն ընկել է հուլիսի վրա, ինչը անցյալ տարվա նույն ժամանակաշրջանի համեմատ, 9 տոկոսով ցածր է:
«Ազադլըգ» թերթը, հղում կատարելով SOCAR-ի հավաստի աղբյուրներին, հայտնել է, որ 2015 թվականին Ադրբեջանի պետական նավթային ընկերության աշխատակիցների ընդհանուր թիվը կազմել էր 52 հազար 104 հոգի: 2014 թվականի վերջին SOCAR-ի աշխատակիցների թիվը եղել է 54 հազար 714 հոգի: Այսպիսով, մեկ տարվա ընթացքում SOCAR-ը աշխատանքից ազատել է 2 հազար 610 աշխատակցի:
Թերթն ավելի վաղ հայտնել էր, որ Ադրբեջանում գազի արդյունահանման ծավալը 10 տոկոսով նվազել է: Ընթացիկ տարվա հունիսին Ադրբեջանի պետական նավթային ընկերության' SOCAR-ի կողմից արդյունահանվել է 512 հազար խորանարդ մետր գազ, ինչը, անցյալ տարվա նույն ժամանակաշրջանի համեմատ, 10,3 տոկոսով ցածր է:
Բաքվում հասարակական կազմակերպությունների ներկայացուցիչների հետ օրերս տեղի ունեցած հանդիպման ժամանակ SOCAR-ի տնտեսական հարցերով փոխնախագահ Սուլեյման Գասըմովը հայտարարել է, որ ընկերության ներքին պարտքը կազմում է 1,095 մլրդ դոլար, իսկ կոնսոլիդացված պարտքը' 6,3 մլրդ դոլար, կամ մոտ 9,4 մլրդ մանաթ: SOCAR-ն Ադրբեջանի Նավթի հիմնադրամի եւ պետբյուջեի գլխավոր մատակարարն է:
«Թուրան» լրատվական գործակալությունը հաղորդել է, որ երկար ժամանակ հսկայական միջոցներ քամուն տալուց հետո, այդ թվում' տարօրինակ լոբբիստական նախագծեր ու միջազգային մրցումների հովանավորում, SOCAR-ը փակել է իր գրասենյակները ԱՄՆ-ում, Գերմանիայում, Բելգիայում եւ Շվեյցարիայում:
«Ազադլըգ» ռադիոկայանը հայտնել էր, որ SOCAR Trading Group-ը 250 մլն դոլար հերթական վարկը օրերս վերցրել է UniCredit Bank Austria բանկից: Վարկն ուղղված է ընկերության առեւտրային գործունեության պաշտպանությանը: Ադրբեջանի ընդդիմությունը SOCAR-ին խստորեն քննադատել է արտաքին փոխառությունների համար' հիշեցնելով, որ անցյալ տարի ընկերությունը 489 մլն դոլար վարկ է ստացել Gazprombank-ից, Ադրբեջանի միջազգային բանկից' 1 մլրդ 291 մլն դոլար, Կանադայից' 3,3 մլրդ դոլար, եւ պատրաստվում է 2 մլրդ դոլարի վարկ ստանալ Վերակառուցման եւ զարգացման Եվրոպական բանկից ու Ասիական զարգացման բանկից, եւ եւս 1 մլրդ դոլար վարկ' Կորեայի Eximbank-ից:
Ադրբեջանի ընդդիմությունը համոզմունք է հայտնել, որ վերջնարդյունքում SOCAR-ի վերցրած վարկերը վճարելու է պետությունը:
Ադրբեջանի պետական նավթային ընկերությունը (SOCAR) «Ինտերֆաքս-Ազերբայջան»-ին ավելի վաղ հայտնել էր, որ SOCAR-ը 2016 թվականի հունվար-ապրիլին, անցյալ տարվա նույն ժամանակահատվածի համեմատ, 8,5 տոկոսով կրճատել է նավթի արդյունահանման ծավալը, ինչը կապված է ինչպես նավթի համաշխարհային շուկայում պահանջարկի նվազման, այնպես էլ ադրբեջանական նավթահանքերում նավթի պակասելու հետ:
Ադրբեջանի պետական նավթային հիմնադրամի տվյալներով' «Ազերի-Չիրաղ-Գյունեշլի» գլխավոր նավթահորերի համալիրից արդյունահանվող նավթի վաճառքից մուտքերը 2016 թվականի հունվար-մայիսին, անցյալ տարվա նույն ժամանակաշրջանի համեմատ, 30,3 տոկոսով նվազել են' ընթացիկ տարվա հինգ ամիսներին կազմելով 1,8 մլրդ դոլար:
ԱՊԱ լրատվական գործակալությունն ավելի վաղ հաղորդել էր, որ Միջազգային վարկանիշային Moody's գործակալությունը Ադրբեջանի պետական նավթային ընկերության' SOCAR-ի CFR (Corporate Family Rating) վարկանիշը' սեփական պարտավորությունները կատարելու ունակությունը հաստատել է Ba1 մակարդակի: SOCAR-ի SUR (Senior Unsecured Rating) վարկանիշը եւ դեֆոլտի հավանականության գծով վարկանիշը եւս Ba1 մակարդակի վրա է, իսկ SOCAR-ի վարկանիշների գծով կանխատեսումը նեգատիվ է:
Fins.az լրատվական կայքը, հղում կատարելով Նավթ արտահանող երկրների կազմակերպության (OPEC) զեկույցին, հայտնում է, որ 2016 թվականին Ադրբեջանում նավթի արտադրանքի միջին ծավալը օրական 20 հազար բարելով պակասելու է:
OPEC-ի կանխատեսումներով' Ադրբեջանում միջին տարեկան կտրվածքով նավթի օրական արտադրանքի ծավալը չի գերազանցի 820 հազար բարելը:
Ադրբեջանական ԶԼՄ-ներն ավելի վաղ հայտնել են, որ անցյալ տարվանից նավթի համաշխարհային գների անկման հետեւանքով ադրբեջանական մանաթի արդեն մոտ 150 տոկոսով արժերկման պատճառով 2016 թվականի սկզբից մինչ այժմ Ադրբեջանի ՀՆԱ-ն 40 տոկոսով նվազել է, Ադրբեջանի արտաքին առեւտրաշրջանառությունը մոտ կիսով չափ կրճատվել է, Ադրբեջանի տնտեսությունն սկսել է արագորեն անկում ապրել:
Ադրբեջանի արտահանման 95 տոկոսը կազմում են գազը, նավթն ու նավթամթերքները, իսկ երկրի պետբյուջեն 75 տոկոսով ձեւավորվում է էներգակիրների արտահանումից ստացվող եկամուտների հաշվին: