Ռուսաստանում ԻՊ-ի հավաքագրորդների խոշոր ինտրենետ-ընկերություն են մերկացրել

Կասեցվել է «Ռոհնամո» ինտերնետ-ընկերության գործունեությունը, որը քարոզում էր «Իսլամական պետություն» ահաբեկչական կազմակերպության գաղափարները եւ դրա համար միջոցներ հանգանակում: Այս մասին ՏԱՍՍ-ին հայտնել են ՌԴ Անվտանգության դաշնային ծառայության հասարակական կապերի կենտրոնում:

Ինչպես պատմել են Անվտանգության դաշնային ծառայությունում, օգոստոսի 10-ին Սվերդլովսկի, Տյումենի եւ Չելյաբինսկի մարզերում տեղի են ունեցել 27 խուզարկություններ «Ռոհնամո բա սուի դավլաթի իսլոմի» («Իսլամական պետության» ուղեցույց) ընկերության անդամների բնակության վայրերում:

«Առգրավվել են համակարգիչներ, շարժական հեռախոսներ, որոնք պարունակում են ահաբեկիչների քարոզչական տեսանյութեր, ծայրահեղական գրականություն, բանկային քարտեր, ինչպես նաեւ զինապահեստ, որը ներառում է երեք ատրճանակ, չորս նռնակ, շուրջ 500 գրամ պլաստիտ, հինգ տրոտիլային պայթաղյուսիկ՝ մեկ կիլոգրամ ընդհանուր զանգվածով, դրանց էլեկտրաճայթիչներ»,- ասված է գերատեսչության հաղորդագրության մեջ:

Անվտանգության դաշնային ծառայությունում նշել են, որ «Ռոհնամո» ընկերությունը, որին Ռուսաստանում եւ արտասահմանում (հիմնականում ԱՊՀ-ի երկրներում) անդամակցում է ավելի քան 100 հազար մարդ, որոնք առավելապես Կենտրոնական Ասիայի բնակիչներ են, համակարգվում է «ահաբեկչության տասնյակ մոդերատորների» կողմից, որոնք գործում են Ռուսաստանում, Մերձավոր Արեւելքի եւ Մաղրիբի երկրներում: