Քլինթոնը գրեթե եռակի գերազանցում է Թրամփին երիտասարդ ամերիկացիների շրջանում ժողովրդականությամբ

Դեմոկրատական կուսակցությունից ԱՄՆ-ի նախագահի թեկնածու Հիլարի Քլինթոնը նախընտրական արշավում իր մրցակցին՝ հանրապետական Դոնալդ Թրամփին գրեթե եռակի գերազանցում է երիտասարդ ամերիկացիների շրջանում ունեցած ժողովրդականությամբ:

Այդ մասին վկայում են հասարակական կարծիքի նոր հարցման արդյունքները, որոնք հրապարակել է USA Today թերթը: Դրանցից հետևում է, որ Քլինթոնի օգտին պատրաստ են իրենց ձայնը տալ ԱՄՆ-ի մինչև 35 տարեկան քաղաքացիների 56 տոկոսը, իսկ Թրամփը կարող է ակնկալել տարիքային այդ կատեգորիայի ընտրողների միայն 20 տոկոսի աջակցությունը: Որպես նախապատվությունը Քլինթոնին տալու գլխավոր հիմնավորում հարցման մասնակիցները նշել են «վարչական աշխատանքի նրա մեծ փորձը»: Այդ մասին հայտարարել է հարցման՝ նրան համակրող մասնակիցների 57 տոկոսը:

Իսկ Թրամփի օգտին քվեարկել ցանկացողների հիմնական «խթան» է նշվել «Սպիտակ տուն Քլինթոնի հայտնվելը թույլ չտալը»: Դա խոստովանել է Թրամփի երիտասարդ կողմնակիցների 54 տոկոսը: Օգոստոսի 5-ից մինչև 10-ն անցկացված հարցմանն ընդամենը մասնակցել են 18-ից մինչև 34 տարեկան 1539 ամերիկացիներ, հաղորդել է ՏԱՍՍ-ը: