Նյու Յորքի իշխանություններն ավելի քան 4 մլն դոլար կվճարեն ոստիկանի կողմից սպանված աֆրոամերիկացու ընտանիքին

Նյու Յորքի իշխանությունները որպես փոխհատուցում ավելի քան 4 միլիոն դոլար կվճարեն քաղաքի սեւամորթ բնակիչ Աքայ Գեռլիի ընտանիքին, որը 2014 թվականի նոյեմբերին ոստիկանի կողմից սպանվել Է Բրուքլինի շրջանում: Օգոստոսի 16-ին այս մասին հայտնել է New York Times թերթը:

Սքոթ Ռինեցկիի խոսքով, որը հանդես է գալիս որպես տուժող կողմի ներկայացուցիչ, վճարման հիմնական գումարը կկազմի 4,1 միլիոն դոլար: Այս միջոցները սպանվածի դստեր, որն այժմ չորս տարեկան է, հաշվին կփոխանցվեն չափահասության հասնելուց հետո: Բացի այդ գումարից, Գեռլիի դուստրը եւ նրա մայրը 400 հազար դոլար կստանան Նյու Յորքի Բնակարանային տնտեսության վարչությունից: Սպանության մեջ մեղավոր ոստիկան Փիթեր Լիանգը 25 հազար դոլար կվճարի տուժող կողմին:

Միջադեպը տեղի է ունեցել 2014 թվականի նոյեմբերի 20-ին արեւելյան Բրուքլինի բազմահարկ տներից մեկում: Պարեկային Լիանգն ընկերոջ հետ իջնելիս է եղել ութերորդ հարկից, երբ հանկարծ մի հարկ ներքեւ սանդղահարթակ են դուրս եկել 28-ամյա Աքայ Գեռլին եւ նրա ընկերուհի Քիմբեռլի Բալինգերը: Ոստիկանը կրակել է անզեն աֆրոամերիկացու վրա, եւ գնդակը մխրճվել է նրա կուրծքը:

Տղամարդուն անհապաղ տեղափոխել են հիվանդանոց, բայց նրան փրկել չի հաջողվել, հաղորդել է ՏԱՍՍ-ը: