Շամշադինի մեղրի ու հատապտուղների 5-րդ հոբելյանական փառատոնը տավուշցիներին ջազային համերգ կնվիրի

Շամշադինի մեղրի ու հատապտուղների 5-րդ հոբելյանական փառատոնը կտևի 2-3 օր: Առաջին անգամ Շամշադինում տեղի կունենա ջազային մեծ տոնախմբություն, որին հնարավորություն ունի մասնակցելու յուրաքանչյուրը: Հայաստանի պետական ջազային նվագախումբը՝ Արմեն Հյուսնունցի ղեկավարությամբ, «Ջազը սահմանին՝ բաց երկնքի տակ» խորագրով Տավուշում համերգ կտա օգոստոսի 20-ին: Կիրակի օրը՝ օգոստոսի 21-ին, Բերդի Սորանի այգում տեղի կունենա բուն փառատոնը, որին կմասնակցեն ՀՀ սիրված ու ճանաչված երգիչներ, պարային խմբեր, իսկ հյուրերը կարող են համտեսել Տավուշի մեղրն ու հատապտուղները: Փառատոնն իրականացվում է «Տավուշի հոգևոր վերածնունդ» հիմնադրամի կողմից:

Մեղրի և հատապտուղների փառատոնը Տավուշի զարգացման ծրագրի կարևոր բաղկացուցիչ է։ Փառատոնը մեկնարկել է 2012 թվականին և ավանդաբար անցկացվում օգոստոսի երկրորդ կեսին, Բերդ քաղաքի «Սորան» ազգային պարկում։

Շամշադինցիների համար բոլոր տաղավարները տրամադրվում են անվճար, ինչպես բոլոր տարիներին, այլ մարզերից ցանկացողները ևս կարող են մասնակցություն ունենալ: