ՀԱՊԿ-ի խաղաղապահները Բելառուսում կանցկացնեն «Անխախտ եղբայրություն-2016» վարժանքները

Հավաքական անվտանգության պայմանագրի կազմակերպության անդամ երկրների խաղաղապահները Բելառուսում կանցկացնեն «Անխախտ եղբայրություն-2016» վարժանքները, որոնց ընթացքում կփորձարկվի փոխգործակցությունը խաղախապահ առաջադրանքներ կատարելիս: Այդ մասին հայտարարել է զորավարժություններում ռուսական զորակազմի ներկայացուցիչ գնդապետ Օլեգ Նովակը:

«Վարժանքների շրջանակում խաղաղապահները կիրականացնեն պայմանականորեն հակամարտող կողմերի տարանջատման, բուֆերային գոտիների ստեղծման, շարժական հսկիչ անցակետերի գործունեության կազմակերպման առաջադրանքները»,- ասել է ռուս զինվորականը, որը խոսքը օգոստոսի 17-ին մեջբերել է «Բելառուսի զինվորական թերթը»:

Ինչպես նշել է Նովակը, ռուս զինվորականները առաջադրված խնդիրները կատարելու համար կներգրավեն հետախուզական, ինժեներային, սակրավորների դասակներ, ռադիացիոն, քիմիական եւ կենսաբանական հետախուզության ջոկ, թիկունքային եւ տեխնիկական ապահովման ստորաբաժանումներ, ինչպես նաեւ անօդաչու թռչող սարքեր:

«Անխախտ եղբայրություն-2016» վարժանքները օգոստոսի 23-27-ը կանցկացվեն Բրեստի մարզի «Օբուզ-Լեսնովսկի» զորափորձարանում: Ռուս եւ բելառուս զինվորականներից բացի, զորավարժություններին կմասնակցեն Հայաստանից, Ղազախստանից, Ղրղզստանից եւ Տաջիկստանից ժամանած խաղաղապահները, հաղորդել է ՏԱՍՍ-ը: