Ասք ժամանակավոր տվայտանքերի մասին

Հիշում եք ապրիլյան պատերազմին հաջորդած ցավալի բացահայտումը՝ սահմանը պաշտպանող ու պատերազմում զոհվածները ամենաանապահով խավի ներկայացուցիչներն են:

Թե գումար չունես, թե չես կարող քո զավակին հեռու պահել սահմանային թոհուբոհից, նա պետք է լինի առաջնագծում։

Քավ լիցի, բնավ չեմ ասում, թե մեր սահմանները չեն պահվելու, մեր սահմաններին զինվորներ պետք չեն կամ էլ միայն հարուստի տղան պետք է այնտեղ լինի։

ՀԱՎԱՍԱՐՈՒԹՅՈՒՆ։

Խոսեցինք այդպես էլ իրականություն չդարձող հավասարության մասին։ Խոսեցինք ցավոտ խնդրի մասին։ Մի քանի անգամ լուսանկար ու տեսանյութ տարածեցինք ու վերջ։ Թեման կարծես թե մոռացվում է։ Մոռացվում են սոցիալական տխուր պատկերներն ու ֆինանսական հոգսերը։

Մենք այդպիսին ենք։ Մի թեմայի շուրջ մի քիչ խոսում ենք, տվայտվում ու վերջ։ Գտնում ենք նորը, նորի շուրջ պտտվում, տվայտվում ու....

...«Սասնա ծռերի» թեման կարծեք թե կամաց-կամաց խամրում է։ Կամաց-կամաց մոռանում ենք, որ զինված խմբի անդամները սոցիալական վատ պայմաններում էին ապրում, որ նրանց գումար է պետք, այս դեպքում, իհարկե, չի քննարկվում բուն գործողությունները, որի քննությամբ զբաղվում են իրավապահները...

Ինչևէ։

Տվայտվելու նոր առիթ ունենք։ Պարզվում է` մեր օլիմպիական մեդալակիրները ապրում են ոչ բարվոք բնակարաններում, մարզվում են խայտառակ պայմաններում գտնվող մարզադպրոցներում...

Երկու օր է համացանցը ողողված է Գյումրիում արված լուսանկարներով։ Պարզվում է, որ այն մարզադպրոցը, որտեղ մարզվում է օլիմպիական չեմպիոն Արթուր Ալեքսանյանը, կիսախարխուլ վիճակում է...

Երազ, տխուր երազ են հիշեցնում նաև ընթացող օլիմպիական խաղերի արծաթե մեդալակիր Գոռ Մինասյանի բնակարանային պայմանները՝ երիտասարդն ու իր ընտանիքի անդամները բնակվում են կիսախարխուլ տնակում...

Քննարկման, ախ ու վախ անելու, իշխանություններին հայհոյելու նոր թեմա ունենք։ Տաք-տաք գրում ենք, կիսվում ու մեկնաբանում։ Եվ վերջ։

Շուտով սրա վերջն էլ կգա։

Ասում են` կյանքը առաջ է գնում, տեղում դոփել պետք չէ։ Սակայն հետևողական աշխատանքը տեղում դոփելը չէ։ Պետք է դատարկ խոսելու փոխարեն, գործի անցնել։

Պետք է իշխանություններին փնովելուց զատ նրանց գործի մղել։ Գործի մղելուց էլ հետևել ու սկսածը ավարտին հասցնել։

Եվ ոչ թե նոր քննարկման թեման մշուշոտ ապագայում չտեսած՝ վազենք ու մի կողմ թողնենք դեռ լուծում չստացածը։

Չի կարելի մոռանալ ապրիլյան պատերազմի հերոսներին, չի կարելի մոռանալ ոչ մեկին, հատկապես այն դեպքում, որ անհատը քո ու բոլորիս համար է արյուն ու քրտինք թափել։

Սիրում եմ մեծերին ցիտել՝ սթափվել է պետք...

Անի Սահակյան