«Մեկն ինձ է ուզում ընտրի, մեկն՝ ուրիշին». Արայիկ Խանդոյանի դեմ պայքարող գյուղապետ

Երեկ «Սասնա ծռեր» խմբի անդամ Արայիկ Խանդոյանը «Նուբարաշեն ՔԿՀ»-ից հայտարարություն էր տարածել, դիմելով իր հայրենի Ծաղկահովիտ գյուղի բնակիչներին, որտեղ մարտավարական նկատառումներից ելնելով, իր թեկնածությունն է դրել հայրենի համայնքում ընտրություններին մասնակցելու համար:

Նամակով տեղեկացրել է, որ իրեն արգելվել է հանդիպումներ ունենալ իր վստահված անձանց հետ և այդ կերպ ոտնահարվել է օրենքի պահանջը: «Հերթական անգամ ապացուցեց, որ ինքը ի զորու չէ ազատ, արդար և ժողովրդավար ընտրություններ կազմակերպելու»,- ասված է Խանդոյանի նամակում:

ԼՈւՐԵՐ.com-ի թղթակցի հետ զրույցում էլ Ծաղկահովիտի գործող գյուղապետ Երվանդ Խաչատրյանն ասաց, որ նախընտրական շրջանում համայնքում որևէ լարվածություն չի նկատում և գյուղում ամեն ինչ նորմալ է, ինքն էլ կարողանում է հանդիպել իրեն ընտրողների հետ, լսել առկա խնդիրները:

«Մեկն ինձ է ուզում ընտրի, մեկն՝ ուրիշին, ինչ կարող եմ ասել, ամեն մարդ ինքն է որոշում՝ ում ընտրի»,- ասաց գյուղապետը, ով այս ընտրություններում կփորձի երկրորդ անգամ ղեկավարել համայնքը:

Նշենք, որ Արայիկ Խանդոյանն իր նամակում վստահություն է հաղորդել, որ հաղթահարելով բոլոր ճնշումներն ու ապօրինությունները, առավել ևս այս պայմաններում, իր համայնքի բնակիչները կկատարեն հայրենիքի համար արդար և ճիշտ ընտրություն` հանուն բարօրության: