Բնապահպանության նախարարությունը գորշ արջի քոթոթի նկատմամբ դաժան վերաբերմունքի հարցով դիմել է ոստիկանություն

ՀՀ բնապահպանության նախարարության աշխատակազմի բնապահպանական պետական տեսչությունը սեպտեմբերի 5-ին «Հետք» էլեկտրոնային պարբերականի «Կարմիր գրքում գրանցված գորշ արջի քոթոթը՝ Երևանի Գոգոլի փողոցում» հրապարակումից տեղեկացել է, որ Երևանի Գոգոլի 107 հասցեում անազատ պայմաններում պահվում է ՀՀ կենդանիների կարմիր գրքում գրանցված գորշ արջի քոթոթ: ՀՀ բնապահպանության նախար արության աշխատակազմի բնապահպանական պետական տեսչության Երևանի տարածքային բաժնի տեսուչներն ահազանգի հետքերով նույն օրն այցելել են վերը նշված հասցե, սակայն քոթոթին այնտեղ չեն հայտնաբերել:

Ինչպես տեղեկացրին ՀՀ բնապահպանության նախարարության տեղեկատվության և հասարակայնության հետ կապերի բաժնից, ըստ քաղաքացիների բանավոր հայտարարության՝ կենդանին տեղափոխվել էր Երևանի Սևանի փ. 17 հասցե: Սակայն նշված հասցեում ևս տեսուչները չեն հայտնաբերել արջի քոթոթին:

Համացանցային հրապարակումից երևում է, որ կենդանու նկատմամբ դրսևորվել է դաժան վերաբերմունք («Վարչական իրավախախտումների վերաբերյալ» ՀՀ օրենսգրքի 92-րդ հոդված), ուստի ՀՀ բնապահպանության նախարարության աշխատակազմի բնապահպանական պետական տեսչությունը դիմել է ՀՀ ոստիկանության Երևան քաղաքի վարչության պետ, գնդապետ պարոն Ս. Մարտիրոսյանին՝ ձեռնարկելու համապատասխան միջոցներ վայրի կենդանուն հայտնաբերելու և դրա ճակատագիրը տնօրինելու նպատակով: