Թեկնածուն հույս ունի, որ նույնիսկ իր մրցակիցն է իրեն ընտրելու. Ապարանում մութ ուժերով համեմված ընտրություններ են սպասվում

Սեպտեմբերի 18-ին տեղական ինքնակառավարման մարմինների հերթական ընտրություններ են նշանակված Արագածոտնի, Արարատի, Արմավիրի, Սյունիքի և Տավուշի մարզերի 317 համայնքում:

Այդ օրը քաղաքապետ են ընտրելու նաև Արագածոտնի մարզի Ապարան քաղաքում, որտեղ իր թեկնածությունն է առաջադրել գործող քաղաքապետ ՀՀԿ-ական Գոռ Աբրահամյանը և ինքնաառաջադրված գործարար Էդգար Փարվանյանը:

Այս համայնքում ԿԸՀ-ն մերժել է անկուսակցական Տիգրան Հովհաննիսյանի դիմումը, իսկ մյուս թեկնածուն`Տիգրան Եղիազարյանը, ինքնաբացարկ է հայտարարել:

ԼՈւՐԵՐ.com-ի թղթակիցը ընթացող քարոզարշավի վերաբերյալ զրուցել է քաղաքապետի պաշտոնի համար պայքարող երկու թեկնածուների հետ:

Մեզ հետ զրույցում` Էդգար Փարվանյանն ասաց, որ քարոզարշավը հանդուրժողականության մթնոլորտում է ընթանում և ինչ-որ հապճեպ հայտարարություններ չի ուզում անել իր շանսերի վերաբերյալ, որպեսզի մեծախոսություն չթվա և հույս հայտնում, որ հասարակությունը սեպտեմբերի 18-ին ճիշտ որոշում կկայացնի:

«Ես, օրինակ, քաղաքացիների հետ հանդիպումից ինքնագովազդով չեմ զբաղվում, պարզապես խոսում եմ այս տարիների ընթացքում կուտակված խնդիրների և դրանց լուծումների մասին, տնական զրույցի ենք բռնվում, ոչ, շատ խիստ քաղաքական դիալոգի մեջ չենք մտնում»,- ասաց թեկնածուն:

Մեր այն հարցին, թե փաստորեն ինքն ուժերը փորձում է չափել ՀՀԿ-ի թեկնածուի հետ, Փարվանյանն ասաց. «Ես ՀՀԿ-ի թեկնածուի դեմ չեմ պայքարում, քանի որ հանրապետականը չունի նման որոշում: Ճիշտ է, նա ՀՀԿ-ական է, բայց դա չի նշանակում, որ կուսակցությունը որոշում է կայացրել՝ սատարելու իրեն»:

Թեկնածուն հակված չէ երաշխավորություն տալ, թե մրցակից թեկնածուն ինչպես իրեն կդրսևորի ընտրությունների ընթացքում, բայց իր կողմից վստահեցնում է, որ քվեին հասնելու արդար ճանապարհ է որդեգրել, քանի որ իր առաջադրվելը ինքնանպատակ և էմոցիոնալ որոշում չէ: Նրա խոսքով`առավոտյան չի արթնացել ու որոշել գնալ մասնակցելու ընտրություններին, և այս ամենն արմատներ ունի»: 

«Միգուցե ստացվի այնպես, որ նաև ինքն էլ ինձ ընտրի, դա կստացվի  ընտրական նոր մշակույթ, որին ես սպասում եմ, որին ես շատ ձգտում եմ և հույս ունեմ, որ մեր քաղաքում ընտրությունների նոր մշակույթ կձևավորվի»,- ասաց Փարվանյանը:

ԼՈւՐԵՐ.com-ի թղթակիցը գործող քաղաքապետ Գոռ Աբրահամյանին հարցրեց՝ ինքը պատկերացնո՞ւմ է մի իրավիճակ, երբ կգնա ու կընտրի իր մրցակցին, քանի որ Փարվանյանն արդեն մեր զրույցում ասել էր, որ կձգտի նոր մշակույթի. «Բացառված է, Փարվանյանը շատ երիտասարդ է, չի պատկերացնում ընդհանրապես իր հնարավորությունները, երիտասարդ է և ոգևորված, երիտասարդ տղա է, թող փորձի: Թերագնահատել, մեծամիտ լինել, գոռոզ լինել և նման արտահայտություններ անել՝ կիրթ երիտասարդի արտահայտություն չէ»:

Գործող քաղաքապետն ասաց նաև, որ իր համայնքում հսկայական ներդրում է արել, ժողովորդը տեսնում և գնահատում է: 

«Իմ միակ խնդրանքն այն է, որ արտաքին ոչ մի ուժեր չմիջամտեն, որպեսզի մեր ընտրությունները նորմալ ընթանան: 

Մեր ճշտող հարցին, թե իր կարծիքով մրցակցի ետևում այլ ուժեր կան՝ Աբրահամյանն ասաց. «Այո, նրա ետևում մութ ուժեր կան կանգնած, ես արհամարհում եմ նման ուժերին, տղամարդը բաց ճակատով պետք է կանգնի»:

Զրուցեց` Նելլի Ավետիսյանը