Լյուբլինում կայացել են Հայաստանի և Արցախի անկախության 25-ամյակին նվիրված ցուցահանդեսներ

Հասարակություն 7 Սեպտեմբեր, 2016 21:57

Լեհաստանում ՀՀ դեսպանության հովանու ներքո սեպտեմբերի 4-5-ը Լյուբլին քաղաքում բացվել են լեհաստանաբնակ հայ գեղանկարիչների անհատական ցուցահանդեսներ' նվիրված Հայաստանի և Արցախի անկախության 25-ամյակին: Այս մասին «Արմենպրես»-ին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից՝ հավ ելելով. «Սեպտեմբերի 4-ին Լյուբլինի Մշակույթի հանդիպումների նորաբաց կենտրոնում տեղի ունեցավ Գդանսկում բնակվող հայազգի գեղանկարիչ Գագիկ Պարսամյանի գեղարվեստական ձևավորումների և «Ծաղիկներ ջրվեժ» խորագրով ցուցահանդեսի բացման արարողությունը: Միջոցառմանը ներկա էին և ելույթներով հանդես եկան Լեհաստանում ՀՀ դեսպան Էդգար Ղազարյանը, Լյուբլինի Եվրոպական սննդի փառատոնի տնօրեն Վալդեմար Սուլիչը, ՀՀ արվեստի վաստակավոր գործիչ, ՀՀ ժողովրդական նկարիչ Փարավոն Միրզոյանը, Հայաստանի Ազգային պատկերասրահի տնօրեն Արման Ծատուրյանը, Լյուբլինի մշակույթի հանդիպումների կենտրոնի տնօրեն Պյոտոր Ֆրանաշեկը: Ցուցահանդեսի այցելուներին ներկայացվեց նաև հայկական ժողովրդական երգարվեստը՝ Լյուբլինում բնակվող հայազգի մեներգիչ Աշոտ Մարտիրոսյանի կատարումներով:

Նույնը օրը Լյուբլինի կենտրոնական «Գրանդ հոտել Լյուբլինյանկա» հյուրանոցում բացվեց Լեհաստանի Խելմ քաղաքում բնակվող, 2016 թվականի ԼՀ մշակույթի նախարարության ոսկե մեդալին արժանացած գյումրեցի գեղանկարիչ Հովհաննես Ղազարյանի անհատական ցուցահանդեսը:

Սեպտեմբերի 5-ին Լյուբլինի Վենիավսկի հյուրանոցի ցուցասրահում տեղի ունեցավ Լեհաստանի Պուլտուսկ քաղաքում բնակվող հայազգի գեղանկարիչ Գրիգոր Ասլանյանի անհատական ցուցահանդեսի բացման արարողությունը: Ցուցահանդեսի բացմանը ներկա էին և ելույթներով հանդես եկան Լեհաստանում ՀՀ դեսպան Էդգար Ղազարյանը, Լյուբլինի Եվրոպական սննդի փառատոնի տնօրեն Վալդեմար Սուլիչը, Լյուբլինի քաղաքապետարանի ներկայացուցիչ Թոմաշ Անջեյ Ռակովսկին:

Ցուցահանդեսն անցկացվել է Լյուբլինում քաղաքի Եվրոպական սննդի 8-րդ փառատոնի մշակութային միջոցառումների շրջանակներում, որին Հայաստանը մասնակցում է գլխավոր հյուրի կարգավիճակով' պայմանավորված ՀՀ անկախության 25-ամյակով: Փառատոնի շրջանակներում կազմակերպված բոլոր միջոցառումներն անցկացվում են Լեհաստանում ՀՀ դեսպանության հովանու ներքո»: