Իրանի դեսպանությունը բարձր է գնահատում իրանցիներին ՀՀ ոստիկանության աջակցությունը Նովրուզ Բայրամին

ՀՀ ոստիկանության շտաբի պետ, ոստիկանության գեներալ-մայոր Արամ Զաքարյանը սեպտեմբերի 7-ին ընդունել է Հայաստանի Հանրապետությունում Իրանի Իսլամական Հանրապետության դեսպանության հյուպատոս Մոխթար Շահ Հոսեյնի գլխավորած պատվիրակությանը: Այս մասին տեղեկանում ենք ՀՀ ոստիկանության պաշտոնական կայքից՝ հավելելով. «Ողջունելով հյուրերին՝ Արամ Զաքարյանը կարևորեց ինչպես երկու երկրների երկարամյա բարեկամական հարաբերությունները, այնպես էլ իրավապահ ոլորտում համագործակցության բարձր մակարդակը, որն իր փաստաթղթային ամրագրումը ստացել է դեռևս 2012 թ. հուլիսի 10-ին' ոստիկանության պետ, գեներալ-լեյտենանտ Վլադիմիր Գասպարյանի և Իրանի Իսլամական Հանրապետության ներքին գործերի նախարար Մոսթաֆա Մոհամմադ Նաջջարի միջև ստորագրված «Իրանի Իսլամական Հանրապետության ներքին գործերի նախարարության և Հայաստանի Հանրապետության ոստիկանության միջև համագործակցության մասին» փոխ ըմբռնման հուշագրով:

Մոխթար Շահ Հոսեյնին նախ շնորհակալություն հայտնեց մարտ ամսին Նովրուզ Բայրամի կապակցությամբ Հայաստան ժամանած հազարավոր իրանցիներին ցուցաբերած աջակցության համար, հատկապես բարձր գնահատելով անձնագրային, ճանապարհային ոստիկանության և արտաքին ծառայությունների աշխատանքը, և հույս հայտնեց, որ գործընկերային հարաբերությունները ոստիկանության և դեսպանության հետ էլ ավելի կամրապնդվեն և կզարգանան:

Բարեկամական ու կառուցողական մթնոլորտում անցած հանդիպման ընթացքում կողմերը քննարկեցին փոխադարձ հետաքրքրություն ներկայացնող այլ հարցեր ևս» :