Գալուստ Սահակյանը ուղերձ է հղել Լրագրողների համերաշխության միջազգային օրվա առթիվ

ՀՀ Ազգային ժողովի նախագահ Գալուստ Սահակյանը շնորհավորական ուղերձ է հղել Լրագրողների համերաշխության միջազգային օրվա առթիվ: Այս մասին տեղեկացրին ՀՀ ԱԺ հասարակայնության և տեղեկատվության միջոցների հետ կապերի վարչությունից:

«Հարգելի՛ լրագրողներ,

շնորհավորում եմ ձեզ Լրագրողների համերաշխության միջազգային օրվա առթիվ:

Լրագրողի հավատամքը ճշմարտությունն է, որը չունի սահման, այնպես, ինչպես ոչ միայն լրագրողների, այլեւ մարդկային համերաշխությունն ընդհանրապես: Այն նաեւ լրագրողներին համախմբող գաղափար-գործոն է: Որքան համերաշխ կլինեն նրանք այդ գործոն-գաղափարին դավանելու, այն լուսաբանելու եւ ընթերցողին հասցնելու հարցում, այնքան հզոր կլինի նրանց խոսքը, այնքան արժեքավոր կլինի այն ճշմարտությունը, որի կարիքը հասարակություներն ու պետություններն ունեն բոլոր ժամանակներում:

Հարգելի՛ լրագրողներ,

դուք ճշմարտությունն ամրագրում եք ոչ միայն թղթի վրա, եթերում կամ համացանցում, այլեւ, առաջին հերթին, մարդկանց գիտակցության մեջ: Հետեւաբար, օբյեկտիվ եւ անաչառ տեղեկատվություն ներկայացնելը նաեւ պատասխանատվություն է մարդու եւ պետության ճակատագրի հանդեպ:

Պաշտպանելով ճշմարտությունը՝ դուք պաշտպանում եք այն լուսաբանելու, տեղ հասցնելու ձեր իրավունքը: Որքան համերաշխ ու միասնական լինեք այդ գործում, այնքան ավելի հասանելի կլինի ձեր տեղեկատվությունը, այնքան հավաստի կլինի ճշմարիտ խոսքը, այնքան հաստատուն կլինի ձեր քաղաքացիական դիրքորոշումը, այնքան ավելի պաշտպանված կլինեն ձեր իրավունքները, որոնք լայնորեն երաշխավորված են Սահմանադրությամբ եւ դրանից բխող օրենսդրությամբ:

Եւս մեկ անգամ շնորհավորելով Լրագրողների համերաշխության միջազգային օրվա առթիվ՝ մաղթում եմ բոլորիդ առողջություն, լավատեսություն եւ բարեկեցություն»,-ասված է ԱԺ նախագահի շնորհավորական ուղերձում: