Հորդ Աստծոն մեռնեմ, իմ աշխատած ձևն ու ոճը ժողովուրդը գիտի. Ագարակի գյուղապետի միակ թեկնածու

Սեպտեմբերի 18-ին տեղական ինքնակառավարման մարմինների հերթական ընտրություններ են նշանակված Արագածոտնի, Արարատի, Արմավիրի, Սյունիքի և Տավուշի մարզերի 317 համայնքում:

Համայնքի ղեկավար կընտրեն նաև Արագածոտնի մարզի Ագարակ գյուղում, որտեղ նախ առաջադրվել էին երկու թեկնածու՝ անկուսակցական Գևորգ Խաչատրյանը, ով ինքնաառաջադրվել էր և 1991 թվականից գյուղապետի պաշտոնում գտնվող Վահան Խաչատրյանը, ում առաջադրել է ՀՀԿ-ն: Սակայն այս գյուղում, որն ունի շուրջ 2000 բնակիչ, ընտրությունները բավականին հետաքրքիր ընթացք են ստանում, քանի որ թեկնածուներից մեկը՝ Գևորգ Խաչատրյանը, ինքնաբացարկ է հայտարարել և ընտրությունները կանցկացվեն մեկ թեկնածուով:

ԼՈւՐԵՐ.com-ի թղթակիցն ընտրությունների վերաբերյալ զրուցեց համայնքի ղեկավարի միակ թեկնածու, գործող գյուղապետ Վահան Խաչատրյանի հետ:

-Պարո’ն Խաչատրյան, փաստորեն Դուք գյուղապետի միակ թեկնածուն եք, հանդիպումներ ունենո՞ւմ եք Ձեր ընտրողների հետ, ինչպե՞ս եք կազմակերպում նախընտրական շրջանը:

-Այ մարդ, ես սաղ օրը գյուղացիների մեջ եմ, կարո՞ղ է ես չինովնիկ եմ, մինիստր եմ, վարչապետի խորհրդական եմ, ես սաղ օրը գյուղացիների մեջ եմ:

-Ի՞նչ խնդիրներ ունի Ագարակն այսօր:

-Ինչ խնդիրներ կան՝ մանրից լուծում ենք, էլի, լուսավորության հարցն ենք լուծել, հիմա էլ փորձում ենք լուծել գազիֆիկացման հարցը, ջրագծի անցկացման խնդիրներ կան, բայց դա շատ մեծ փողերի հետ է կապված: 

-Պարո’ն Խաչատրյան, ինչպե՞ս է ստացվում, որ 1991 թվականից գյուղապետի պաշտոնում եք և կարողանում եք շահել ժողովրդի վստահությունը:

-Լսի, հորդ Աստծոն մեռնեմ, դա ժողովուրդը գիտի, իմ աշխատած ձևն ու ոճը գիտի: Ժողովուրդն ընտրում է, թեկնածուներ եղել են՝ պուզատիներ-մուզատիներ, բայց ժողովուրդն իր ընտրությունն է անում:

-Ձեր հարազատ կուսակցությունը՝ ՀՀԿ-ն, ինչ-որ կերպ օգնո՞ւմ է Ձեզ:

-ՀՀԿ-ն ո՞նց օգնի, էդ, որ ասում են «լծակներ», ի՞նչ լծակ, էդ լծակները որտե՞ղ են, ես չեմ իմանում դրանց տեղը էսքան ժամանակ, իմ համար նման բաներ չի եղել: