Ինչո՞ւ են խանութներում վաճառվում պոլիէթիլենային տոպրակները և ի՞նչ խնդիր է այդ կերպ լուծվում

Վերջին շրջանում երևանյան մի շարք խանութներում նոր տենդենց սկսվեց՝ պոլիէթիլենային տոպրակները ոչ թե առևտրի հետ տրամադրում են, այլ՝ վաճառում:

Հասարակությունն այնքան էլ միանշանակ չի ընդունել այս նոր երևույթը, քանի որ այն մեկ օրվա մեջ մտավ շրջանառության մեջ և շատերն անգամ խանութում անակնկալի եկան: Թե ինչ խնդիրներ են լուծվում պոլիէթիլենային տոպրակները վաճառքի հանելով՝ ԼՈւՐԵՐ.com-ի թղթակիցը զրուցել է «Իրազեկ և պաշտպանված սպառող» հ/կ-ի նախագահ Բաբկեն Պիպոյանի հետ:

«Ըստ էության, այս գործընթացը հերթական անգամ գալիս է ապացուցելու, որ մեր երկրում ստեղծվել է կիսատ-պռատ իրավիճակ: Պոլիէթիլենի դեմ պայքարի միջոցառումների շարքում կարող էր ներառվել նաև պոլիէթիլենային տոպրակների վաճառքի հարցը, բայց նման դեպքում, երբ պետական մակարդակով պոլիէթիլենի դեմ պայքար է իրականացվում, այս հարցերը լուծվում են համակարգային մի շարք ուսումնասիրություններից հետո, երբ արդեն իսկ ստեղծված են համապատասխան ենթակառուցվածքներ՝ աղբահանման խնդիրների համար: Լինում է ալտերնատիվ տոպրակների արտադրություն կամ ներմուծում ու իրացում ավելի մատչելի գնով: Իրացման ցանցում ստեղծված է լինում ընտրության հնարավորություն, մասնավորապես, էկոլոգիապես մաքուր թղթե տոպրակների վաճառք է լինում»,- ասաց Պիպոյանը: 

Ըստ նրա՝ միայն այս դեպքում պոլիէթիլենային տոպրակները շրջանառությունից հանելու իրական հնարավորություններ կստեղծվեին, բացի այդ կխթաներ նոր աշխատատեղերի բացմանը. «Հիմա, երբ պոլիէթիլենային տոպրակների համար սահմանել ենք գին, նաև պետք է փոխեինք որակը, և այդ գինը ոչ թե պետք է լիներ 10 դրամ, այլ պայմանական 50 դրամ և ոչ թե կլինեին մեկանգամյա օգտագործման, այլ բազմակի օգտագործման»,- ասաց նա՝ նկատելով, որ այսօր պոլիէթիլենային տոպրակների դեմ պայքարելու պետական ռազմավարություն չկա, և սա մասնավոր հատվածի որոշումն է: Մեր զրուցակիցը ենթադրում է, որ չի բացառվում՝ սա լուրջ գրանտ է, և նախաձեռնությունը կազմակերպել է ինչ-որ խոշոր միջազգային կազմակերպություն: 

«Աշխարհում ոչ մի երկրում չկա նման բան, երբ անցնում են պոլիէթիլենային տոպրակների դեմ պայքարի, բայց մարդկանց կյանքում ոչինչ չի փոխվում, բացի այն բանից, որ տոպրակները վաճառվում են: Ավելին ասեմ, եթե այսօր տոպրակ չտանեք ձեզ հետ խանութ՝ այնպես չէ, որ ձեզ այլ՝ էկոլոգիապես մաքուր տարբերակ կառաջարկեն»:

ԼՈւՐԵՐ.com-ն այս հարցով զրուցեց նաև «Հայաստանի սպառողների ասոցիացիա» ՀԿ-ի նախագահ Արմեն Պողոսյանի հետ, ով կարծում է, որ տոպրակների վաճառքը ճիշտ մոտեցում է և լուծում է էկոլոգիական լուրջ խնդիր, քանի որ այդ պոլիէթիլենի նյութը 600 տարի չի քայքայում և մեծ վտանգ է ներկայացնում, իսկ, եթե փորձեն այրելու միջոցով ոչնչացնել՝ թունավոր գազեր են առաջանում: 

«Այլանդակություն է, սխալ ձևով է կիրառվում և լրացուցիչ բեռ է դարձել սպառողի համար»,- ասում է Պողոսյանը:

Նա նկատում է նաև, որ վաճառվող տոպրակները կրում են տվյալ խանութի լոգոն, անվանումը, այսինքն՝ սպառողը հերիք չէ պարտադրված գնում է տոպրակը՝ մի հատ էլ խանութի գովազդն անելով խանութից հասնում է իր տուն: Արմեն Պողոսյանը կարծում է, որ պետք է այդ դեպքում վաճառվող տոպրակները չլինեն գովազդային հարթակներ:

Զրուցեց՝ Նելլի Ավետիսյանը