«Հայջրմուղկոյուղին» «կռուտիտ» է լինում. ըստ Վարդաբլուրի գյուղապետի՝ Աստված էլ վերևից իջնի` հարցը լուծում չի ստանա

Արագածոտնի մարզի Վարդաբլուր գյուղի բնակիչներից ԼՈՒՐԵՐ.com-ը բողոքներ ստացավ այն մասին, որ գյուղ հասնող խմելու ջուրը նույնիսկ կենցաղային հարցերը հոգալու համար պիտանի չէ։ Գյուղացիները նշում են, որ գյուղ հասնելու ճանապարհին, ջուրը մոտ հինգ կիլոմետր տարածություն անցնում է բաց առվով և մեծ քանակությամբ աղբ է իր հետ բերում։

Հարցի շուրջ զրուցեցինք գյուղապետ Արտավազդ Գալստյանի հետ, ով նշեց՝ ժամանակին «Հայջրմուղկոյուղին» է զբաղվել գյուղի ջրամատակարարման հարցով, բայց միևնույն է վիճակը եղել է նույնը։

«Ես նույնիսկ սեփական միջոցներով ջրավազան եմ կառուցել և առաջարկել եմ «Ջրմուղին» կազմակերպել միայն զտման պրոցեսը, որից նրանք նույնպես հրաժարվել են։ Գյուղի ջրագիծը անցնում է մեկ այլ գյուղի տարածքով ու կրճատվում է։ Փաստացի «Ջրմուղը» մեզ հասանելիք ջուրը վաճառում է մեկ այլ գյուղի»,- դժգոհեց գյուղապետը։

Գյուղապետի հետ խոսակցության ընթացքում պարզեցինք, որ նույն ճակատագրին է արժանացել նաև հարևան Ռիաթազա գյուղը։ Գյուղապետի խոսքով՝ «Հայջրմուղկոյուղի» ՓԲԸ-ն, հասկանալով իրավիճակի ծախսատարությունը, բառացիորեն հրաժարվել է գյուղի ջրամատակարարման համակարգից։

Թեմայի մասին պարզաբանում ստանալու ակնկալիքով դիմեցինք «Հայջրմուղկոյուղի» ընկերության մամուլի ծառայություն, որտեղից մեզ լրիվ հակառակ ինֆորմացիան տրամադրեցին։ Ըստ նրանց՝ համայնքը ինքն է պաշտոնական նամակով հրաժարվել ջրամատակարարումից։

Գյուղապետ Արտավազդ Գալստյանն այս հարցը պարզաբանեց հետևյալ կերպ. «Ամեն վթարից հետո գյուղ օրերով ջուր չէր հասնում, և «Ջրմուղը» մեր վրա էր դրել ոչ միայն գյուղի ներքին ցանցի սպասարկման հարցերը, այլև ջրագծի այն հատվածի սպասարկումը, որը գտնվում է գյուղից դուրս։

Ի պատասխան «Հայջրմուղկոյուղու» պահանջների՝ մենք առաջարկել ենք ընդամենը մեկ պայման, այն է՝ ամեն օր ջուր ունենալ և, եթե նույնիսկ մեկ օր գյուղ ջուր չհասնի՝ մենք չենք վճարելու ամսվա ջրի դիմաց։ Ամեն դեպքում, ողջ ջրագիծը սպասարկում և սպասարկելու էր գյուղապետարանը, իսկ գյուղացին «Հայջրմուղկոյուղուն» ոչինչ չանելու դիմաց վճարելու գումար չունի։ Թող «Ջրմուղը» «կռուտիտ» չլինի։ Հարցն էնքան ծեծված է, որ, թվում է, Աստված էլ վերևից իջնի, լուծում չի ստանա»։

Հիշեցնենք՝ Վարդաբլուր գյուղը գտնվում է Ապարան-Վանաձոր ավտոճանապարհից մի քանի կիլոմետր հեռավորության վրա։ Խմելու ջուր չունենալը գյուղի միակ խնդիրը չէ, գյուղի ճանապարհը անհիշելի ժամանակներից անմխիթար վիճակում է, իսկ վերջին ամիսների ընթացքում գյուղը զրկվել է նաև միջհամայնքային հանրային տրանսպորտից։

Միքայել Նազարյան