ՀՀ ԳՆ փոխնախարարը 2015 թ. մթերված խաղողի պարտքերի մարումը համարում է ժամանակի խնդիր

2015 թ. ընթացքում մթերված խաղողից մնացած պարտքերը կազմում են 800 մլն դրամ՝ ընդհանուր 31.5 մլրդ դրամից: Հիմնականում պարտեր ունեցողները 10-12 կազմակերպություններ են, եւ բոլորը՝ բացի մեկ կազմակերպությունից, պարտքերը վերադարձնում են. ամբողջական մարումը ժամանակի խնդիր է:

Սեպտեմբերի 9-ին լրագրողների հետ հանդիման ժամանակ, անդրադառնալով 2015 թվականին խաղողի մթերումից հետո գյուղացիներին դեռ չվերադարձված գումարներին, այս մասին ասաց ՀՀ գյուղատնտեսության նախարարի տեղակալ Ռոբերտ Մակարյանը: Նա պարտքերի առկայությունը կապում է ռուսական ռուբլու արժեզրկման և գնողունակության անկման հետ ու հավելում, որ վերամշակողները չկարողացան գինեգործական արտադրանքը այնպիսի ծավալով վաճառել, որպեսզի շրջանառու միջոցներ ունենան մթերման գործընթացը 2015 թ. լիարժեք կազմակերպելու համար:

«2011 թվականից անընդհատ աշխատում ենք վերամշակող ձեռնարկությունների հետ, որպեսզի գյուղացիական տնտեսությունների հետ կնքեն պայմանագրեր: Մինչև 2015 թվականը պայմանագրերը շուրջ 2.5 անգամ աճել են, հիմնականը խաղողի մասով էր: Այդուհանդերձ, պահանջարկի և առաջարկի հարաբերակցությունը որոշում է շուկան, իսկ վերամշակողները պատրաստ էին ընդունել այն ծավալը, որն առաջարկում են գյուղացիական տնտեսությունները»,- ասաց Ռոբերտ Մակարյանը:

Փոխնախարարը նկատեց, որ մի քանի տարի առաջ պայմանագրերը չէին ցանկանում կնքել գյուղացիական տնտեսությունները, հիմա խնդիրը կա վերամշակողների կողմից, որովհետև ունեն իրացման խնդիր:

Անդրադառնալով պետական աջակցության ծրագրերին՝ Մակարյանը շեշտեց, որ հողօգտագործողների համար բազմաթիվ ծրագրեր են իրականացվում, իսկ վերամշակողներին տրամադրվում են վարկային միջոցներ' հիմնականում մթերման համար: