Այն հիմնական ռիսկը, վտանգը, որի հետևանքով կարող ենք մեր անկախությունը կորցնել

Հայաստանի անկախության 25-ամյակի կապակցությամբ է մեր հարցազրույցը «Նոր ժամանակներ» կուսակցության նախագահ Արամ Կարապետյանի հետ:

- Ձեր կարծիքով, Հայաստանի Հանրապետության անկախության անցած 25 տարում մեր հիմնական ձեռքբերումը ո՞րն է եղել:

- Հենց անկախությունը: Սակայն, իմ կարծիքով, դեռ չի հաջողվել նորմալ պետություն ստեղծել, որը կհամապատասխաներ անկախ պետականություն ապահովելու և առաջ տանելու համար անհրաժեշտ պահանջներին: Մեր անկախությունն իսկապես այն լուրջ ձեռքբերումն է հայ ազգի համար, որը պետք է պահպանենք, չնայած նրան, որ անկախությունը պահելը շատ բարդ է ստացվում հայերիս մոտ: Այնուամենայնիվ, անդրադառնալով ձեր հարցին, ասեմ, որ մեր հիմնական ձեռքբերումները եղել են անկախությունը և այն, որ Արցախի խնդիրն ինչ-որ ձևով լուծում է գտել:

- Իսկ ո՞րն է եղել հիմնական կորուստը:

-Մարդի՛կ: Նրանց մի մասը խեղվեց, որոշ մասը զոհվեց, անհամեմատ ավելի մեծ մասն արտագաղթեց երկրից: Պետությունների համար ամենամեծ կորուստը միշտ քաղաքացիները, մարդիկ են եղել: Նրանք են ամենամեծ արժեքը պետության համար:

- Առաջիկայի համար ունե՞ք դրական սպասումներ և, եթե այո՝ կասե՞ք Ձեր ակնկալությունների մասին:

- Իհարկե, ես սպասումներ ունեմ, որովհետև, որպես մարդ, ինքնաբավ եմ, եթե սպասումներ չունենայի, քաղաքական գործունեությունս էլ կդադարեցնեի: Իմ սպասումները նրա մեջ են, որ չնայած բոլոր դժվարություններին, մեզ հաջողվելու է փոխել համակարգը, որովհետև պետությունը կա, պետականությունը կա, բայց իմաստը կորսվել է: Այսինքն` մենք ի՞նչ ենք ուզում…

Կառավարող համակարգը հիմնված է այլ սկզբունքների վրա: Կարծում եմ, որ դա փոփոխելուց հետո, իհարկե, կհաջողվի Հայաստանը տարածաշրջանում բավականին լուրջ պետություն սարքել, ես դրանում կասկած չունեմ:

- Ո՞րն է այն հիմնական ռիսկը, վտանգը, որի հետևանքով կարող ենք մեր անկախությունը կորցնել:

- Սխալ կառավարումը և տարածաշրջանային քաոսը: Սխալ կառավարումը կարող է հանգեցնել մեր պետականության իսպառ ոչնչացման: Մեր ամենամեծ ներքին թշնամին կառավարման բոլորիս հայտնի համակարգն է, և այն իշխանությունը, որն իրականացնում է այդ կառավարումը: Դա իսկապես թշնամական վերաբերմունք է սեփական պետությանը, նկատի ունեմ կոռուպցիան, թալանը, այդ մարդիկ նպատակաուղղված զբաղվում են թալանով արդեն քանի տարի, ուղղակի աչքներիս առաջ թալանում են և իրենց համար հանգիստ թողնում, գնում…

Ինչ վերաբերում է տարածաշրջանային քաոսին, ապա այն մեզանից կախված չէ: Տարածաշրջանում կա քաոս, մեր աչքի առաջ Թուրքիան է, Սիրիան է, այդ քաոսը տարբեր երկրներ ընդգրկելով, առաջ է գնում, մեր սահմաններին շատ մոտ այն կանգնել է, և փորձեր է արվում մեզ ներքաշել դրա մեջ: Ահա դա նույնպես կարող է պատճառ դառնալ մեր անկախության ու պետականության կորստի: Իմիջիայլոց, դարերի ընթացքում միշտ այդպիսի բաներ եղել են

Հարցազրույցը` Արթուր Հովհաննիսյանի