Լրագրողից՝ կուսակցության նախագահ

Արդյո՞վ ովքեր են…

Պատգամավորներ են, ովքեր նստած ԱԺ փափուկ աթոռներին, երևի թե՝ հանուն ազգիս բարօրության կամ ի շահ իրենց, օրենքներ են ընդունում, մերժում, ասում, խոսում, քննարկում ու քննարկվում…

Արդեն 4 տարի է՝ 131 պատգամավոր ապրում է մեր վճարած հարկերի շնորհիվ ու, երևի թե, սրտատրոփ սպասում 2017-ին՝ մեկ էլ տեսար վերընտրվեց, մեկ էլ տեսար…

Քանի որ հաշված ամսիներ են մնացել մինչ ԱԺ ընտրությունները, Լուրեր.com_ը սկսում է վերհիշել նրանց գործունեությունը՝ պատգամավոր առ պատգամավոր ներկայացնելով նրանց անցած ուղին:

Եվ այսպես՝ Նաիրա Զոհրաբյան:

………

Ծնվել է 1965թ. մայիսի 8-ին Երևանում:

Գերազանցությամբ ավարտել է Երեւանի թիվ 21 միջնակարգ դպրոցը: 1987թ. գերազանցությամբ ավարտել է Երեւանի Գեղարվեստա-թատերական ինստիտուտի թատերագիտության բաժինը:

Ավարտել է միջազգային ժուռնալիստիկայի երկամյա դասընթացներ: Մասնագիտական վերապատրաստումը անցել է Մոսկվայի Թատերական Արվեստի պետական ինստիտուտում, Մոսկվայի Կինոյի միութենական պետական ինստիտուտում, ինչպես նաեւ՝ Մոսկվայի առաջատար թատրոններում:

Թատերական բազմաթիվ աշխատությունների հեղինակ է, որոնք տպագրվել են տեղական եւ արտերկրի մշակութային պարբերականներում:

1992թ. աշխատել է լրագրող «Ար», «Առավոտ», «Հայոց աշխարհ», «Հայք» պարբերականներում: 1999-2006թթ.՝ «Հայկական ժամանակ» օրաթերթի քաղաքական մեկնաբան: 2007թ.՝ «Կենտրոն» հեռուստաընկերության «Վերելք» քաղաքական հաղորդաշարի հեղինակ-վարող:

2007-2012թթ.՝ Ազգային ժողովի պատգամավոր (համամասնական ընտրակարգ, ԲՀԿ): 19.06.2007-08.06.2009թթ.՝ Ազգային ժողովի գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի նախագահի տեղակալ, 16.06.2008-15.09.2009թթ.՝ 2008 թվականի մարտի 1-2 Երեւան քաղաքում տեղի ունեցած իրադարձությունների եւ դրանց պատճառների ուսումնասիրության Ազգային ժողովի ժամանակավոր հանձնաժողովի անդամ, 08.06.2009-31.05.2012թթ.՝ Ազգային ժողովի եվրոպական ինտեգրման հարցերի մշտական հանձնաժողովի նախագահ:

2012թ. մայիսի 6-ին Ազգային ժողովի պատգամավոր է ընտրվել համամասնական ընտրակարգով «Բարգավաճ Հայաստան» կուսակցությունից:
Ունի մեկ դուստր:
…………
Ահա: Եվս մեկ ապացույց, որ քաղաքականության խրթին աշխարհում հարթ ուղի հարթելու համար բնավ անհարժեշտ չէ քաղաքագիտության դոկտոր-պրոֆեսոր լինել, անցնել տարբեր մասնագիտական կուրսեր, և այլն, և այլն…
Թե թատերագետ ես կամ լրագրող՝ արդեն իսկ ընտիր է:

Ընտիր է ԱԺ մտնելու համար, ընտիր է կուսակցության նախագահ դառնալու համար, հարց է, թե ինչ գործեր կարող ես կատարել…
Երբ համացանցով փնտրում ես դետալներ, որ կպատմեն նրա քաջագործությունների մասին, չես գտնում՝ կարծեք թե նրա անունը կապված չէ որևէ սկանդալի հետ, չկան նաև զգլխիչ հաջողությունների մասին պատմող կետեր:

Փոխարեն կգտնես ընդդիմադիր կեցվածքով կնոջ ոգեշունչ ելույթներ, որոնց նպատակն է՝ երկիրս գաղջից փրկելը:
Սակայն պարզվում է՝ ոչ միշտ են ելույթներն անկեղծ ու անվախ՝ վկա է ԱԺ մեկ այլ պատգամավոր Նիկոլ Փաշինյանը:
Այս տարվա հունիսի 29-ին Փաշինյանը Ընտրական օրենսգրքի երկրորդ ընթերցման ժամանակ անդրադարձավ ՕԵԿ, ՀԱԿ, ԲՀԿ կուսակցություններին՝ վիճելով Զոհրաբյանի հետ.

«Մի կուսակցություն կա, վեր ա կենում ասում ա՝ աղանդավորական խմբակները: Ու սա ասում ա մի կուսակցություն, որի ամբողջ կենսագրությունը մինչեւ բոլորովին վերջերս կառուցված ա մեկ անձի առավոտյան, միջօրեի եւ երեկոյան պաշտամունքի վրա: Ախր չի կարելի, էլի, տիկին Զոհրաբյանն ասում ա՝ մենք գիտենք ձեր չափը, ձեր պայմանավորվածությունները, թե դուք մինչեւ ուր կարաք խոսաք: Ախր լավ էլ չի ասել՝ իրիկունը ինքը իրա ձեռով զանգում ասում ա՝ Հովիկ Արգամիչը ջղայնացել ա, որ ես «բամփել» բառ եմ օգտագործել, խնդրում եմ, հանկարծ չհրապարակեք էդ բառը, խնդրում եմ, ջղայնացել ա: Զգույշ եղեք, էքստազի մեջ մի ընկեք, բառապաշարը ճշտեք, ախր չափերը խախտում եք»:

Ասվածին իհարկե հակադարձեց տիկինը, սակայն պատմության մեջ մնաց որպես զանգող ու խնդրող…

Նա պատմության մեջ է մնացել նաև մեկ այլ դրվագով՝ ֆինանսական:

2015-ին, երբ Ծառուկյանը հայտարարեց, որ դուրս է գալիս ԲՀԿ-ից ու նախագահ Սարգսյանի համաձայնությամբ կուսակցության նախագահի ղեկն անցավ Զոհրաբյանին, վերջինս սկսեց հակամարտել ԲՀԿ մեկ այլ անդամ Աբրահամ Մանուկյանի հետ:
ԲՀԿ-ում կռիվ էր: Փողի կռիվ:

«Ժողովուրդը» գրեց, թե ինչպես կողմերը չեն կարող կիսել կուսակցության փողերը, թե ինչպես են վիճում ու հարցի լուոծումը փնտրում արդեն նախկին վարչապետ Հովիկ Աբրահամյանի մոտ…

Հենց այդ օրերին էլ ԲՀԿ-ն սկսեցին լքել կուսակիցները: Նրանք հեռանում էին՝ չկար իրենց համախմբող Ծառուկյանն ու ոչ բոլորի սրտով էր Զոհրաբյանը…

Մեկ տարի անց՝ արդեն Զոհրաբյանն է այս ու այն ամբիոնից հայտարարում, որ պետք է Ծառուկյանի վերադարձը:

Միգուցե թատերագետ-լրագրող ԲՀԿ նախագահ Նաիրա Զոհրաբյանը զգում է վտանգը, որ կարող է 2017-ին չհայտնվել Աժ-ում:

Անի Սահակյան