Սեյրան Օհանյանը հեռանո՞ւմ, թե՞ ամրապնդում է դիրքերը

Դեռ նախկին վարչապետ Հովիկ Աբրահամյանը հրաժարական չէր տվել, երբ ներքաղաքական դաշտը բլթբլթում ու եռ էր գալիս տարատեսակ խոսակցություններով առ այն, որ շուտով Հայաստանում փոփոխություններ են սպասվում:

Եղավ ճիշտ այդպես:

Աբրահամյանն այլևս նախկին վարչապետ է, 2 նախարարներն էլ՝ պաշտոնակատարներ, որոնք սպասում են վերանշանակման:

Սպասում են մեծ սպասումով, քանզի ներքաղաքական դաշտը շարունակում է բլթբլթալ ու եռ գալ տարատեսակ խոսակցություններով առ այն, որ նրանցից ոմանք մնալու են առանց նախարարական պորտֆելների:

Նրանցից մեկը ՊՆ նախարար Սերյան Օհանյանն է: Ապրիլյան պատերազմից հետո հարցը դարձել էր ամենաքննարկվողներից մեկն ու, կարծես թե, առիթ էր պետք՝ նրան դաշտից հեռացնելու համար…

Որոշ ժամանակ ակտիվորեն քննարկվում է հարցը, որ ՊՆ պորտֆելը հանձնվելու է ՀՀ գլխավոր ոստիկանապետ Վլադիմիր Գասպարյանին կամ ԼՂՀ պատգամավոր Վիտալի Բալասանյանին…

Այս պահին, սակայն, ամենահավանական թեկնածուն ՀՀ աշխատակազմի ղեկավար Վիգեն Սարգսյանն է: Քաջատեղյակները վստահեցնում են, որ հարցն արդեն որոշված է, իսկ ՊՆ-ի մեր աղբյուրները նշում են, որ արդեն իրենք էլ ոչնչի չեն հավատում ու սպասում են, որովհետև յուրաքանչյուր րոպե իրենց մոտ տրամադրվածություն է փոխվում…
Թե ով կլինի նոր նախարարը, պարզ կլինի մինչ շաբաթվա վերջ:

Իսկ ու՞ր է գնալու պարոն Օհանյանը:

Ի զարմանս շատերի՝ հարցին պատասխանում է պաշտոնական Մոսկվան:

Ըստ «Интерфакс» գործակալության՝ Հայաստանի պաշտպանության նախարար Սեյրան Օհանյանը նշանակվելու է Հավաքական անվտանգության մասին պայմանագրի կազմակերպության (ՀԱՊԿ) գլխավոր քարտուղարի պաշտոնում:

«Առաջիկայում Օհանյանը կազատվի Պաշտպանության նախարարի պաշտոնից: Նա կզբաղեցնի ՀԱՊԿ գլխավոր քարտուղարի պաշտոնը»,-ասել է գործակալության զրուցակիցը:

Իհարկե, շատերս ենք հիշում, որ Օհանյանը հերքեց այդ լուրը՝ նշելով, որ նա առաջարկը չի ընդունի:

Սակայն, Օհանյանի ապագան ռուսական թելերով հյուսվում է ոչ միայն այս դեպքում:

Մանրամասնեմ:

Ըստ մամուլում շրջանառվող լուրերի՝ Սեյրան Օհանյանը պաշտոնից ազատվելուց հետո կղեկավարի Վիկտոր Դալլաքյանի կողմից հիմնադրվող «Շրջադարձ» կուսակցությունը:

Իսկ հիշյալ կուսակցությունը, «Ասպարեզի» աղբյուրների համաձայն, ֆինանսավորվելու է անմիջապես Ռուսաստանի Դաշնությունից:
Թեպետ, Դալլաքյանը դեռ չի հաստատում, նաև՝ չի էլ հերքում լուրը, սակայն մեր աղբյուրները նշում են, որ կուսակցության կանոնադրությունն արդեն գրված է՝ խիստ ռուսական շեշտադրությամբ, կուսակցության համար արդեն իսկ էլիտար տարածք է վարձակալվել, հայտնի է անգամ մամուլի խոսնակի անունը, ով մոտ կես տարի առաջ էր լքել լրատվական դաշտը…

Հարց է առաջանում՝ Օհանյանը, թողնելով նախարարի պաշտոնը, թուլացնու՞մ է դիրքերը, թե՞, ամեն դեպքում, նոր խաղացողի դերով հանդես գալիս:

Ամեն դեպքում, Մոսկվան շարունակում է ամրապնդել դիրքերը, թեպետ, նախնական գնահատականով, սա հաջողված ծրագիր չէ:

Անի Սահակյան