Սերժ Սարգսյանն ազատվում է իրեն հավատարիմ կադրերից…

Հայաստանում սկիզբ առած փոփոխությունների հուժկու ալիքը, դատելով ամենայնից, մոտենում է նաև մարզպետարաններին, ու, ամենայն հավանականությամբ, շուտով ականատես ենք դառնալու տոտալ փոփոխությունների նաև պետական համակարգի այս օղակներում:

Այսպիսով՝ արդեն իսկ հայտնի է, որ Սուրիկ Խաչատրյանին Սյունիքի մարզպետի պաշտոնում փոխարինելու է Վահե Հակոբյանն, ինչն առաջին խոշոր փոփոխությունն է, որին ձեռնամուխ է լինում հայրենի կառավարությունը ռեգիոնալ ղեկավարման բնագավառում: Այս փոփոխությունը, սակայն, ոչ մի կերպ չի կարելի համարել պարզապես կառավարության կողմից վարվող կադրային նոր քաղաքականության արդյունք. այն ավելին է, քան պարզ փոփոխությունը և խոսում է մի շարք հետաքրքրական պրոցեսների մասին, որ տեղի են ունենում իշխանական բուրգի ներսում: Իսկ կարևորագույն հարցը, որ ներկայումս, թերևս, առաջանում է Խաչատրյանի պաշտոնաթողության արդյունքում, այն է, թե հատկապես ինչ խորքային նպատակներ են հետապնդել բարձրագույն իշխանությունները, երբ որոշում էին Խաչատրյանին փոխարինել Հակոբյանով: Անկասկած, հարցն այս իրոք արդիական է, քանի որ ամենևին էլ գաղտնիք չէ, որ «Հանրապետական» կուսակցության՝ ցանկացած տիպի ընտրություններում անկասելի դարձած հաղթանակների հիմնական գաղտնիքն ու լծակը միշտ էլ եղել է ֆինանսավարչական ռեսուրսը:

Իսկ այն, որ Սուրիկ Խաչատրյանը Սյունիքի մարզում այն հիմնական ուժն էր, որ կարողանում էր ընտրություններին ձայներ ապահովել, «Հանրապետականի» համար՝ ի սպաս դնելով իր ունեցած ողջ պոտենցյալն ու մարզում ունեցած հեղինակությունը, առանձնակի գաղտնիք չէր, քանի որ, ցավոք, երկրում, բայց հատկապես մարզերում ստեղծված սոցիալ-տնտեսական վիճակն այնպիսին է, որ առանց ձեռքի տակ եղած վարչական ռեսուրսի, ՀՀԿ-ն չի կարող հուսալ անգամ անցողիկ տոկոսներ հավաքելու մասին. աքսիոմ է՝ աղքատ երկրում իշխանությունները ծայրահեղ աստիճան ոչ պոպուլյար են լինում: Հանգամանքը, որ Հայաստանին ընդամենը ամիսներ են բաժանում խորհրդարանական ընտրություններից, ևս ոչ մի կերպ չի օգնում հասկանալ իշխանությունների տրամաբանությունը, քանի որ կտրել այն ճյուղը, որի վրա նստած ես ճիշտ այն պահին, երբ քեզ լրջագույն փորձություններ են սպասվում առաջիկայում առնվազն խորհրդարանական ընտրությունների տեսքով, մեղմ ասած, այնքան էլ հասկանալի չէ:

Այնպես որ՝ ստիպված ենք ֆիքսել, որ կառավարության այս քայլն առայժմ հարուցում է միայն լրջագույն հարցադրումներ, քան տալիս է դրանց պատասխանները. տպավորություն է, թե ՀՀԿ-ն սուիցիդալ մոլուցքի մեջ է ընկել…

Դավիթ ԲԱԲԱՆՈՎ