Լևոն Տեր-Պետրոսյանի դեմարշը Սերժ Սարգսյանին

Վերլուծական 14 Հոկտեմբեր, 2016 20:32

ՀՀ առաջին նախագահ Լևոն Տեր-Պետրոսյանը հազվադեպ է հանդես գալիս հրապարակային հայտարարություններով: Դրա համար, սովորաբար լուրջ առիթներ կամ իրադարձություններ են պետք: Տեր-Պետրոսյանի գնահատականները գրեթե միշտ ուղեկցվել են իրավիճակային համապարփակ անալիզով, գնահատականներով, որոնք քաղաքական և հանրային դիսկուրսի օրակարգ են ձևավորել:

Առաջին նախագահի երեկվա հայտարարությունը լակոնիկ էր, առանց խորքային գնահատականների, սակայն երկրին սպառնացող դեֆոլտի կոնկրետ կանխատեսումով: Ուշագրավ է, անշուշտ, մեկ այլ հանգամանք. այս տարվա ընթացքում Լևոն Տեր-Պետրոսյանը երկու անգամ է հանդես եկել հրապարակային հայտարարություններով՝ ապրիլյան պատերազմի և հուլիսյան հայտնի իրադարձությունների օրերին: Նախորդ երկու հայտարարություններում Տեր-Պետրոսյանը հանդես է եկել առաջին նախագահի բարձունքից՝ նվազագույնի հասցնելով ներքաղաքական համատեքստը: Շատերն, այդ թվում՝ Լևոն Տեր-Պետրոսյանի նախկին դաշնակիցներն, առաջին նախագահին անգամ մեղադրեցին Սերժ Սարգսյանի հետ համագործակցելու, նրա հետ դաշինք կազմելու մեջ: Երեկվա հայտարարությունն արդեն նման էր Սերժ Սարգսյանին հասցեագրված սպառնալիքի, որովհետև եթե առաջին նախագահը խոսում է դեֆոլտի անխուսափելիության մասին, ապա նախևառաջ մատնացույց է անում իշխանությունների ապաշնորհությունն ու ոչ արդյունավետ կառավարումը: Տնտեսության անմխիթար վիճակի մասին Տեր-Պետրոսյանը գիտեր նաև ապրիլին, երբ կոչ էր անում համախմբվել իշխանության շուրջ:

Հուլիսին ևս տնտեսությունն անկում էր ապրում, սակայն հայտնի իրադարձությունների շուրջ գործող և առաջին նախագահների գնահատականները նման էին իրար՝ նույնիսկ մեկը մյուսին փոխլրացնող:

Մի խոսքով՝ այնպես չէ, որ Տեր-Պետրոսյանը միայն երեկ իմացավ տնտեսության գահավիժման և դեֆոլտի անխուսափելիության մասին: Կարելի է ենթադրել, որ ՏԻՄ ընտրություններում կամ երկրում տեղի ունեցող ավելի գլոբալ գործընթացում որոշակի պայմանավորվածություններ են խախտվել: Գուցե Սերժ Սարգսյանն ինչ-որ խոստումներ, երաշխիքներ է տվել Լևոն Տեր-Պետրոսյանին ու հիմա վերջինս իրեն խաբված է զգում: Երեկվա կարճ հայտարարությունում Տեր-Պետրոսյանը ընտրական գործընթացի բարեփոխումը «թատերական արարողություն» է անվանել: Եվ սա այն դեպքում, երբ ԸՕ բարեփոխման հիմնական նախաձեռնողը հենց Տեր-Պետրոսյանի ՀԱԿ-ն էր, որի փոխնախագահ Լևոն Զուրաբյանը պատմական որակեց իրենց և իշխանությունների համաձայնությունը: Ենթադրում եմ, որ հենց խորհրդարանական առաջին ընտրություններն են եղել Սարգսյան-Տեր-Պետրոսյան հնարավոր համաձայնությունների առարկան:

Մյուս կողմից՝ եթե ԸՕ բարեփոխումը «թատերական» է որակվում առաջին նախագահի կողմից, ապա հիմքեր կան ենթադրելու, որ Տեր-Պետրոսյանն ինչ-ինչ պատճառներով այլևս չի հավատում Սարգսյանի տված երաշխիքներին: Տեր-Պետրոսյանի երեկվա հայտարարությունն իր մեջ հենց սպառնալիքի և անվստահության նոտա է պարունակում: Գուցե առաջին նախագահի մտավախության պատճառն այն է, որ Սերժ Սարգսյանի նախաձեռնած համակարգային «ռեստարտից» հետո, իր թիմն այլևս պահանջարկված չի լինի Բաղրամյան 26-ի համար:

Սարգիս Հակոբյան