1000 դոլար կաշառք վերցրած դատավորի ունեցվածքն ու դրամական միջոցները

ՀՀ Ազգային անվտանգության ծառայությունը քիչ առաջ տարածած հաղորդագրությամբ հաստատեց, որ Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանը ձերբակալվել է 1000 դոլար կաշառք վերցնելու համար: 

Ըստ ԱԱԾ-ի՝ քաղաքացիական գործով կողմի օգտին որոշում կայացնելու համար դատավորը պահանջել և Երևանի հետիոտնային գետնանցումներից մեկում անձամբ ստացել է 1000 ԱՄՆ դոլար գումար, որի փոխանցումն իրականացվել է Ազգային անվտանգության ծառայության աշխատակիցների օպերատիվ վերահսկողության ներքո:

ԼՈՒՐԵՐ.com-ը բարձրաստիճան անձանց էթիկայի հանձնաժողովից տեղեկացավ, որ 1000 դոլար կաշառք վերցրած դատավոր Բարսեղյանի դրամական միջոցները 2014 թվականի սկզբում եղել են 6.400.000 դրամ: Գումարը պահպանվել է նույն չափով՝ մինչև տարեվերջ:

Ըստ նույն աղբյուրի`2015 թվականին դատավորը կրկին նույն քանակի դրամական միջոցներ է հայտարարագրել՝ 6.400.000 դրամ, իսկ տարեվերջին գումարը պակասել է` կազմելով  6.000.000:

Հարկային տարում դատավորի եկամուտը կազմել է 9.805.823 դրամ, որը գոյացել է աշխատանքի վարձատրությունից և /կամ/ դրան հավասարեցված այլ վճարումներից: 

Դատավոր Իշխան Բարսեղյանը չունի կամ չի հայտարարագրել անշարժ և շարժական գույք, արժեթղթեր, փոխառություններ կամ այլ տիպի թանկարժեք գույք: 

Կինը`Արուսյակ Իսրայելյանը ևս հայտարարագրում այլ սեփականություն չի նշել: