ՀՔԾ պետի տեղակալը չի մանրամասնում՝ Լևոն Երանոսյանը հարցաքննվե՞լ է, թե՞ ոչ

Հատուկ քննչական ծառայությունը Բաղրամյան 26-ից կախվածության մեջ չէ: ԱԺ-ում լրագրողների հետ զրույցում վստահեցրեց ՀՔԾ պետի տեղակալ Վլադիմիր Հովհաննիսյանը:

Պնդմանը՝ ՀՔԾ-ում հարուցվում են քրեական գործեր այս կամ այն պաշտոնյայի նկատմամբ, սակայն կառույցին այդպես էլ չի հաջողում խոշոր «ձկներին» բռնել, Հովհաննիսյանը հակադաձեց՝ պնդելով. «Համաձայն չեմ. Եթե հետևեք մեր հրապարակումներին, ապա կտեսնեք, որ բավականին մեծ թվով քրեական գործեր են քննվել, որոնցում պաշտոնատար անձինք են ներգրավված եղել»:

Պատճառաբանելով, որ այս պահին չի տիրապետում վիճակագրական տվյալների՝ Վ. Հովհաննսիսյանն այդպես էլ չհստակեցրեց, թե հարցուցված քրեական գործերից քանիսն են դատական կարգով ավարտվել, և քանիսն են այս պահին դատարանում գտնվում: Նա չկարողացավ նաև մտաբերել գոնե մեկ պաշտոնյայի, ում նկատմամբ քրեական գործ է հարցվել:

Ու չնայած այն պնդումներին, որ Սարի թաղի բախումների ժամանակ արձանագրված տեսանյութերում հստակ երեւում են ՀՀ ոստիկանապետի թիկնազորի պետը, փոխոստիկանապետ Լևոն Երանոսյանը եւ ոստիկանության այլ պաշտոնյաներ, Վլադիմիր Հովհաննիսյանը նշեց՝ դժվարանում է ասել, թե հիշյալ պաշտոնյաները որքանով են կապված այդ բախումների հետ, իսկ մեղավոր լինել-չլինելու հանգամանքը կպարզվի բացառապես քննության ընթացքում: Նա չմանրամասնեց նաև, թե այդ անձինք ինչ կարգավիճակով են ներգրավված գործում:

ՀՔԾ-ի պետի տեղակալի խոսքով՝ գաղտնիության սկզբունքից ելնելով, առայժմ ոչինչ ասել չի կարող, հետևաբար, բոլոր մանրամասներին հանրությունը կծանոթանա միայն քննության ավարտից հետո: Իսկ մինչ այդ՝ նա պարզապես վստահեցնում է, որ ձեռնարկվում են անհրաժեշտ բոլոր միջոցները՝ հանցագործությունն ամբողջությամբ բացահայտելու ուղղությամբ:

Վ. Հովհաննիսյանը շեշտեց նաև, որ քեական գործի նախաքննությունը շարունակվում է,  իսկ նախնական քննության տվյալների հրապարակման անթույլատրելիությունը սահմանող Քրեական դատավարության օրենսգրքի 201-րդ հոդվածի համաձայն՝ նախնական քննության տվյալները կարող են հրապարակվել բացառապես քննությունն իրականացնող քննիչի թույլտվությամբ:

«ՀՔԾ-ն օրերս տարածեց հայտարարություն, որում ասվում էր, թե բացահայտված են ՊՊԾ գնդում երեք ոստիկանների սպանությունները, այդ դեպքում՝ ինչո՞ւ անուններ հրապարակված չէին» դիտարկմանն ի պատասխան՝ ՀՔԾ պետի տեղակալը դարձյալ կրկնեց, որ նախաքննական գաղտնիք է և ելնելով այդ հանգամանքից՝ գործի վարույթն իրականացնող քննիչն ինքն է որոշում՝ ինչ բնույթի տեղեկատվություն հրապարակել, ինչը՝ ոչ: «Եթե վարույթ իրականացնող քննիչը որոշել է, որ այդ ծավալով տեղեկատվություն պիտի տրամադրի, ապա սա բխում է օրենքի շրջանակից»,- ասաց նա:

Ինչ վերաբերում է հարցին՝ Սարի թաղի բախումներն իրականացնելու հրահանգ տվողները կմնա՞ն անպատիժ, Վլադիմիր Հովհաննիսյանն այսպես արձագանքեց. «Բայց եթե չեմ սխալվում՝ յոթ անձի վերաբերյալ այս պահին մեղադրական եզրակացությունն արդեն իսկ անջատվել եւ ուղարկվել է դատարան, որոնցից չորսը կալանավորված են, իսկ նախաքննությունը դեռ շարունակվում է»,- ասաց նա:

Դիտարկմանը՝ հրահանգ տվողներին կառույցը «դաբրո» ունի՞ հրավիրելու գոնե հարցաքննության, մասնավորապես, Լեւոն Երանոսյանին, Վ. Հովհաննիսյանը կրկին չպատասխանեց, հավելելով, որ դա ևս նախաքննական գաղտնիք է: