Կարեն Կարապետյանի գազային ինքնագովազդը

Սեպտեմբերի 15-ին վարչապետ Կարեն Կարապետյանը հանձնարարեց Հանրային ծառայությունները կարգավորող հանձնաժողովին, էներգետիկայի և բնական պաշարների, աշխատանքի և սոցիալական հարցերի նախարարներին՝ քննարկել գազի և էլեկտրաէներգիայի սակագների որոշման սկզբունքները վերանայելու հնարավորությունը:

Ու հիմա՝ գրեթե մեկ ամիս անց, կառավարությունը, «Գազպրոմ-Արմենիա»-ն ու փաստացի ՀՀ իշխանությունը, ամեն կերպ փորձում են կատարել վարչապետի հանձնարարականը. ավելի քան հասկանալի է՝ նոր վարչապետը պետք է վստահություն ունենա ժողովրդի մոտ՝ գալիք ընտրություններից առաջ:

Կարեն Կարապետյանի բախտն այնքանով է բերել, որ նրա հետ հույսեր է կապում նաև Ռուսաստանի Դաշնությունը. հենց Կարապետյանը պետք է դառնա այն պաշտոնյան, ով կկապի Հայաստանը Ռուսաստանին և ոչ մի դեպքում իրեն չի դավաճանի:

Սա է պատճառը, որ ՀՀԿ-ի հիմնասյուներից մեկը՝ Հովիկ Աբրահամյանը, փոխարինվեց հե՛նց Կարեն Կարապետյանով:

Զարմանալի չէ, որ առաջինը «Գազպրոմ-Արմենիա»-ն իր վրա վերցրեց վարչապետին դրական կողմից ներկայացնելու գործը:

«Գազպրոմ-Արմենիա» ընկերությունն արդեն հաղորդագրություն է տարածել այն մասին, որ սպառողներին վաճառվող բնական գազի սակագների նվազեցմանը միտված՝ վերանայման հայտով դիմելու է Հանրային ծառայությունները կարգավորող հանձնաժողովին: Ըստ այդ հաղորդագրության՝ մինչև 10,0 հազար խորանարդ մետր սպառում ունեցող սպառողներին վաճառվող յուրաքանչյուր հազար խորանարդ մետր գազի սակագինը գործող 146.700 դրամի փոխարեն առաջարկվելու է սահմանել 139.000 դրամ՝ ներառյալ ԱԱՀ-ն, իսկ ընտանեկան կամ սոցիալական նպաստ ստացող սպառողների համար՝ տարեկան մինչև 600 խ/մ գազի սպառելու դեպքում՝ վաճառվող յուրաքանչյուր հազար խ/մ-ի սակագինը, ներառյալ ԱԱՀ-ն, կկազմի 100.000 դրամ:

Իհարկե, թեկուզ PR քայլի համար կատարված գնային իջեցումը ձեռնտու է շարքային քաղաքացիներին, մանավանդ, որ գազի գինը նվազելու է բոլորի համար՝ տարբեր սոցիալական խավերի ու տնտեսվարողների: Դրանից հետևում է, որ օրենքով պետք է մի շարք ապրանքների գներ ևս նվազեն, քանի որ չգրված օրենքի համաձայն՝ երբ գազը, լույսը կամ անգամ ջուրը, թեկուզ 1 դրամով թանկանում էին, մի շարք գործարարներ շտապում էին դրա պատրվակով ապրանքի գները բարձրացնել: Հիմա նույն սկզբունքով պարտավոր են շարժվել նաև նվազելու դեպքում:

Սակայն մի հետաքրքիր բան կա այս ամենի մեջ: Գազի գինը իջեցվում է, ոչ թե ռուսական «Գազպրոմ» ընկերության վաճառած գնի հաշվին, այլ «Գազպրոմ-Արմենիա»-ի եկամուտների հաշվին: Մինչև հիմա «Գազպրոմ-Արմենիա»-ն գազը սահմանին «Գազպրոմ»-ից ստանում էր էժան գնով ու կրկնակի թանկ վաճառում ՀՀ քաղաքացիներին: Այդ մասին հաստատ նաև տեղյակ է վարչապետ Կարեն Կարապետյանը, քանի որ ընդամենը մի քանի ամիս առաջ ինքն է ղեկավարել այդ ընկերությունը, ինքն է գնել սահմանից գազը ու վաճառել ՀՀ տարածքում: Սակայն, մինչ Կարապետյանի վարչապետ նշանակվելը՝ «Գազպրոմ-Արմենիա»-ում երևի մտքի ծայրով էլ չեն անցկացրել գների վերանայման մասին, իսկ Կարապետյանի գալուց հետո ոչ միայն վերանայել են, այլ նաև որոշել են գինը էժանացնել՝ իրենց եկամուտների հաշվին:

Իսկ ՀՀ քաղաքացիներիս մնում է հուսալ, որ այս ամենը հետագայում, ժողովրդի բառերով ասած՝ քթներիցս չեն բերելու: Այսքան տարվա մեջ իշխանության կատարած ցանկացած լավ քայլի դիմաց միշտ կրկնակին վերադարձրել ենք:

Չմոռանանք՝ առջևում ընտրություններ են, ներկայիս իշխանություններին քվեներ են հարկավոր:

Չմոռանանք նաև մի բան՝ գազի գինը հատկապես նվազելու է նաև գործարարների համար, իսկ ինչպես հայտնի է՝ Հայաստանում խոշոր գործարարներն անմիջականորեն կապված են իշխանությունների հետ:

Ստացվում է՝ այս դեպքում մեկ կրակոցով սպանվում է ոչ թե երկու, այլ՝ մի քանի նապաստակ…

Անի Սահակյան