Զինծառայողը ևս մարդ է, ով ունի հատուկ պաշտպանության կարիք. ՄԻՊ

ՀՀ մարդու իրավունքների պաշտպան Արման Թաթոյանը վստահեցնում է, որ զինծառայողների իրավունքների պաշտպանության հետ կապված՝ արդեն ՄԻՊ ինստիտուտի և ՀՀ պաշտպանության նախարարության միջև ձեռք է բերվել համապատասխան պայմանավորվածություն՝ հետագայում համագործակցությունը շարունակելու ուղղությամբ և ընդծում է, որ զինվորները ևս ունեն հատուկ պաշտպանության անհրաժեշտություն և իրավունք:

ԱԺ-ում, լրագրողերի հետ զրույցում, պատասխանելով հարցին՝ ինչպե՞ս եք պատկերացնում ՊՆ հետ ՄԻՊ համագործակցությունը՝ հաշվի առնելով, որ այն փակ կառույց է, նա արձագանքեց.
«Իհա՛րկե, անհրաժեշտ է իրականացնել համագործակցություն: Այստեղ կարևորն աշխատանք տանելն է: Եվ խոսքը վերաբերում է տարբեր եղանակներով ուսումնասիրություններին, որտեղ մտադիր ենք ուսումնասիրել տարբեր հիվանդությունների, զինվորների ու նրանց հարազատների բողոքների դիմումների կամ մեր կողմից վեր հանված խնդիրների հիման վրա, որպեսզի լուծումներ գտնենք»,- ասաց նա:

Ա. Թաթոյանի խոսքով՝ այստեղ խոսքը վերաբերում է ոչ միայն համապատասխան իրավական ակտեր փոխելուն, այլ նաև անհրաժեշտության դեպքում դրանց կարգավորելուն. «Մասնավորապես՝ սկսած հաշմանդամության կարգ ստանալուց՝ մինչև զինգրքույկ ձեռք բերելը»:

Դիտարկմանը՝ Ձեզ թույլ կտա՞ն այդ ցավոտ հարեցրին անդրադառնալ, Արման Թաթոյանը շարունակեց, որ Պաշտպանության նախարարի հետ արդեն հանդիպում է ունեցել, որտեղ մանրամասն քննարկում է եղել, և արդեն իսկ կան համապատասխան պայմանավորվածություններ: «Պետք է համատեղ աշխատել և խոսքը չի գնում ռազմական գաղտնիք պարունակող տեղեկությունների մասին, այլ ընդամենը՝ անձի իրավունքների պաշտպանության մասին, այդ թվում՝ զինծառայողների»,- ասաց նա:

Ա. Թաթոյանը վստահեցնում է նաև, որ առաջիկայում հրապարակվելիք զեկույցում տեղ են գտել  ոչ միայն զինծառայողների, այլև ՀՀ մյուս քաղաքացիների իրավունքների խախտումների վերաբերյալ բոլոր արձանագրությունները: «Կարծում եմ՝ զեկույցում կլինեն բավականին ճիշտ գնահատականներ»,-ասաց նա՝ շեշտելով, որ դրանում տեղ են գտել ինչպես խախտումների հետ կապված ուսումնասիրությունները, այնպես էլ հարցադրումներ, որոնք պետք է պարտադիր պարզվեն:

Օմբուդսմենն առայժմ ձեռնպահ է մնում մանրամասնելուց, թե զեկույցում, մասնավորապես, ինչ խախտումներ են տեղ գտել, սակայն հավաստիացնում է, որ բոլոր խնդիրները մանրամասն ուսումնասիրվել են: «Բոլոր հարցերին կանդրադառնանք զեկույցը հրապարակվելուց հետո»:

Հարցին՝ ՀՀԿ-ի մասին զեկույց էիք պատրաստում, բոլոր խախտումներն արձանագրվա՞ծ են, Պաշտպանը վստահեցրեց, որ՝ այո՛ և հավելեց, որ այդ զեկույցն արդեն հրապարակված է: Դիտարկմանը՝ իշխանությունը ցավ զգա՞ց այդ հրապարակումից, Ա. Թաթոյանը շարունակեց. «Եթե զեկույցը ուսումնասիրեք, այնտեղ կան համապատասխան բոլոր գնահատականները»,- ասաց նա: