Արման Թաթոյանը՝ «Սասնա ծռեր»-ին այցելության և իր նկատմամբ վստահության պակասի մասին

Այսօր Ազգային Ժողովում լրագրողների հետ զրույցում ՄԻՊ Արման Թաթոյանը տեղեկացրեց, որ «Սասնա ծռեր»-ի անդամներին վերջին անգամ ինքն անձամբ տեսակցել է սեպտեմբեր ամսին, սակայն ՄԻՊ գրասենյակի աշխատակիցները հաճախ են այցելում նրանց:

«ՔԿՀ այցելելու ժամանակ, ինքս պարտադիր այցելում եմ, իսկ մեր աշխատակիցներն ընդամենը հինգ օր առաջ են տեսակցել նրանց: Եվ առհասարակ՝ մեր աշխատակիցները գրեթե ամեն օր են այցելում քրեակատարողական հիմնարկներ ու զրուցում բոլոր դատապարտյալների հետ»,- ասաց նա:

Ինչ վերաբերում է տեսակետին, թե մարդիկ այսօր այլևս չեն վստահում ու հավատում մարդու իրավունքների ինստիտուտին, Ա. Թաթոյանը չհամաձայնեց՝ նշելով, թե բողոքների քանակը լիարժեքորեն համապատասխանում է մարդու իրավունքների պաշտպանին, և այդ ինստիտուտը Հայաստանում ևս կայացած է. «Եթե համեմատություններ անցկացնենք, ապա բողոքները քանակական առումով համարյա բոլորն էլ նույնն են: Ավելին՝ այս տարի՝ հուլիսին, ՊՊԾ գնդի դեպքերն ուսումնասիրելով, դրանք, բնականաբար, շատացան: Ուշագրավ է, որ ոստիկանության դեմ զգալի թվով շատացել են բողոքները: Ինչ վերաբերում է իմ անձին, այստեղ ևս համամիտ չեմ այն տեսակետի հետ, թե չկա վստահություն: Ես հասցնում եմ լինել բոլոր վայրերում»: