Լավ խաղացող Արմեն Ռուստամյանը

Արդյոք ովքե՞ր են…

Պատգամավորներ են, ովքեր նստած ԱԺ փափուկ աթոռներին, երևի թե հանուն ազգիս բարօրության կամ ի շահ իրենց օրենքներ են ընդունում, մերժում, ասում, խոսում, քննարկում ու քննարկվում…

Արդեն 4 տարի է՝ 131 պատգամավոր ապրում է մեր վճարած հարկերի շնորհիվ ու երևի թե սրտատրոփ սպասում 2017թ.-ին՝ մեկ էլ տեսար վերընտրվեց, մեկ էլ տեսար…

Քանի որ հաշված ամիսներ են մնացել մինչ ԱԺ ընտրությունները, մենք շարունակում ենք վերհիշել նրանց գործունեությունը՝ պատգամավոր առ պատգամավոր ներկայացնելով նրանց անցած ուղին:

Lurer.com-ի դիտակետում հայտնված հաջորդ պատգամավորը ԱԺ ՀՅԴ խմբակցության պատգամավոր Արմեն Ռուստամյանն է:

……………

Ծնվել է 1960թ. մարտի 1-ին Արարատի մարզի Զանգակատուն գյուղում:

1983-1984թթ. ծառայել է Խորհրդային բանակում:

1983թ. ավարտել է Մոսկվայի Պ. Լումումբայի անվան ժողովուրդների բարեկամության համալսարանի ֆիզիկամաթեմատիկական եւ բնական գիտությունների ֆակուլտետը: Ֆիզիկոս:

1984-1991թթ. եղել է ԵՊՀ գիտաշխատող, 1991-1993թթ.՝ հայ-ֆրանսիական համատեղ ձեռնարկության գլխավոր մասնագետ, 1993-1994թթ.՝ Ֆրանսիայի Օրսե քաղաքի Տեսական եւ կիրառական օպտիկայի ինստիտուտի գիտաշխատող: 1990-1995թթ.՝ Երեւանի քաղաքային եւ Մյասնիկյանի շրջանային խորհուրդների պատգամավոր: 1995-1998թթ. բանտարկված է եղել քաղաքական դրդապատճառներով (հետագայում չհաստատված մեղադրանքներով):

1999-2003թթ.՝ Ազգային ժողովի պատգամավոր: ԱԺ արտաքին հարաբերությունների մշտական հանձնաժողովի նախագահի տեղակալ: ՀՅԴ խմբակցության անդամ: ՀՅԴ կուսակցության անդամ:

2003-2007թթ.՝ Ազգային ժողովի պատգամավոր: ԱԺ արտաքին հարաբերությունների մշտական հանձնաժողովի նախագահ: ՀՅԴ խմբակցության անդամ: ՀՅԴ Հայաստանի ԳՄ ներկայացուցիչ:

2007-2012թթ.՝ Ազգային ժողովի պատգամավոր: 07.06.2007-31.05.2012թթ.՝ ԱԺ արտաքին հարաբերությունների մշտական հանձնաժողովի նախագահ: ՀՅԴ խմբակցության անդամ: ՀՅԴ Հայաստանի ԳՄ ներկայացուցիչ:

2012թ. մայիսի 6-ին Ազգային ժողովի պատգամավոր է ընտրվել համամասնական ընտրակարգով ՀՅԴ կուսակցությունից:

……

Դաշնակցական այս պատգամավորն անխոս խորհրդարանի գերազանցիկ պատգամավորների շարքին կարելի էր դասել, եթե չունենար 220 բացակա:

Կիրթ, աշխատող, լրագրողների հարցերի համար՝ գրեթե բաց ու ազատ: Թեպետ այլ տարբերակ էլ չունի՝ խորհրդարանական ուժի խմբակցության ղեկավար է:

Շատերի համար դրական համարվող պատգամավորի վերաբերյալ պատկերացումը փոխվեց այս տարվա փետրվարին, երբ ԱԺ-ում՝ պատասխանելով լրագրողների հարցերին, նշեց, որ Հայաստանում քաղբանտարկյալներ չկան, և վերջինը եղել են 90-ականներին ճաղերի հետևում հայտնված դաշնակցականները, այդ թվում նաև՝ ինքը:

Իշխանական թևի տակ աշխատող սովորական պատգամավորի գնահատական. հանրապետականի հետ կոալիցիա կազմելուց հետո, բնականաբար, ինչպես բոլոր դաշնակցականների, այնպես էլ Ռուստամյանի մոտ քաղաքական գնահատականները փոխվել են: Մենք այլևս բնակվում ենք ազատ, անկախ, լավ երկրում, որտեղ ձգտում են կատարելության, և բոլոր օրինագծերն ու որոշումներն էլ ուղղված են դրան:

Այդ է պատճառը, որ նա այս տարի կողմ է քվերակել թե՛ կառավարության ծրագրին, թե՛ ընտրական օրենսգրքի փոփոխություններին, թե՛ հարկային օրենսգրքին:

Իսկ նախկինում Ռուստամյանը խիստ ընդդիմադիր պատգամավոր էր՝ նույն իշխանության ներկայացրած ծրագրերի քննադատն ու չընդունողը:

Ավելի վաղ կրկին իշխանամետ էր:

Դրանից առաջ…

Կարճ ասած՝ Ռուստամյանը հարմարվող տեսակ է՝ կարող է աշխատել թե՛ իշխանամետի, թե՛ ընդդիմադիրի կեցվածքով. կախված է նրանից, թե այդ պահին քաղաքական ինչ խաղ են խաղում:

Լավ խաղացող Ռուստամյանը, պաշտոնական հայտարարագրերի համաձայն, այնքան էլ լավ չի ապրում՝ խոսքն այս դեպքում իշխանավորին վայել ունեցվածքի մասին է:

03.03.2012 թ ԿԸՀ ներկայացրած հայտարարագրի համաձայն՝ Ռուստամյանը «Անշարժ գույք» բաժնում հայտարարագրել է 1 բնակարան` 98.52 քմ մակերեսով:

Հաշվետու տարվա եկամուտը` 3 մլն 451 հազ. 520 դրամ է (պատգամավորի աշխատավարձ):

Դրամական միջոցները հայտարարագիրը ներկայացնելու օրվա դրությամբ` 15 մլն ՀՀ դրամ, 9000 ԱՄՆ դոլար, 1500 եվրո, որոնք այս տարիների ընթացքում մի փոքր աճել են:

Շարժական և թանկարժեք գույք, արժեթուղթ կամ այլ ներդրում, ըստ հայտարարագրի, չունի:

Թերևս պատգամավորը խաղում է նաև այս կետով՝ տասնյակ տարիների պատգամավորներն իրականում այլ կարողության տեր են, որ կարողանում են ճիշտ ու ծածուկ պահել՝ ապացուցված է գրեթե բոլոր պատգամավորների օրինակով:

Անի Սահակյան