ԴԱՀԿ պետի փաստաբան-խորհրդականի ուշագրավ հայտարարությունը՝ աղմկահարույց թեմայի վերաբերյալ

ԼՈՒՐԵՐ.com-ի զրուցակիցն է ՀՀ Փաստաբանների պալատի անդամ, ՀՀ ԱՆ ԴԱՀԿ ծառայության պետի խորհրդական Արամ Կարախանյանը, ում հետ զրուցել ենք վերջերս աղմուկ հանած թեմայի մասին: Հիշեցնենք, որ ԴԱՀԿ պետի ժամանակավոր պաշտոնակատար Արմեն  Հարությունյանը կառույցը համալրում է իր ծանոթ-բարեկամներով, որոնց թվում են իր երկու խորհրդականները՝ Դալլաքյան Վահագնը և Կարախանյան Արամը: Հաշվի առնելով ԴԱՀԿ-փաստաբանների գործնական հարաբերությունները՝ դժվար չէ ենթադրել, թե փաստաբանների միջոցով ինչ գործառույթներ են հնարավոր իրականացնել: Արդյո՞ք այս ամենը համակարգում սկիզբ առնող կոռուպցիայի դրսևորումներ չէ: Այս պահին դժվար է ասել: 

-Պարոն Կարախանյան, վերջերս մեծ աղմուկ է բարձրացրել այն փաստը, որ Դուք, լինելով Փաստաբանների պալատի անդամ-փաստաբան, զբաղեցնում եք ԴԱՀԿ ծառայության պետի ժամանակավոր պաշտոնակատարի խորհրդականի պաշտոնը: Հասարակական հիմունքներո՞վ եք այն զբաղեցնում:

-ԴԱՀԿ ծառայությունը հասարակական հիմունքներով որևէ ծառայություն չունի, այդ թվում՝ ես բացառություն չեմ: Հետաքրքիր է՝ Ձեզ մոտ այդ հարցն ինչի՞ց է առաջացել: Որտեղի՞ց եք ենթադրել, որ անվճար հիմունքներով եմ աշխատում:

-Դուք, լինելով Փաստաբանների պալատի անդամ, գործող փաստաբան, պետական կառույցում պաշտոն եք զբաղեցնում: Հենց դրանից էլ առաջացել են վերը տրված հարցը և մի շարք այլ հարցեր:

-Օրենքի խախտում չկա, որովհետև ես այստեղ պայմանագրային հիմունքներով եմ աշխատում: Ես ոչ թե ԴԱՀԿ ծառայության հիմնական անձնակազմից եմ՝ կոչումով, առաջխաղացումով, այլ՝ պայմանագրային աշխատող եմ: Փաստաբանը՝ ցանկացած ժամանակ, ցանկացած կառույցում իրավունք ունի պայմանագրային հարաբերություններով աշխատանքի հաստատվել: Այսինքն՝ իմ աշխատանքը հենց այդ տրամաբանությունով է: Եթե ուսումնասիրեք, կտեսնեք, որ դաշտում բազմաթիվ փաստաբաններ կան, որոնք պայմանագրային հիմունքներով այս կամ այն պետական կամ ոչ պետական կառույցում աշխատում են: Դա աշխատանքային հարաբերությունների շրջանակներում է, ոչ թե ծառայողական: 

-Ո՞ր օրենքով է դա սահմանվում:

-Աշխատանքային օրենսգրքով:

-Այսինքն՝ աշխատանքային օրենսգրքում նշված է, որ լինելով փաստաբան, Փաստաբանների պալատի անդամ, կարելի՞ է զբաղեցնել պետական կառույցում որևէ պաշտոն:

-Իմ պաշտոնը հայեցողական է, որի հիմունքները պայմանագրային են: Գլխավոր հարկադիր կատարողը ինձ հետ պայմանագրային հարաբերություն է հաստատել և կնքել ենք աշխատանքային պայմանագիր, ու դրա հիման վրա՝ ես այստեղ եմ աշխատում: Փաստաբանության մասին օրենքը փաստաբանին չի արգելում պայմանագրային հիմունքներով այս կամ այն կառույցում աշխատել: 

-Հիմա որ օրենքը բացենք, կգտնե՞նք այդ կետը, որը չի արգելում փաստաբանին՝ պայմանագրային հիմունքներով աշխատել այլ տեղ: 

-Կգտնեք թե չեք գտնի, չեմ կարող ասել, բայց՝ կա: Ամեն դեպքում՝ ես Պալատին գրել եմ, որ այստեղ եմ աշխատում: Ի՞նչ եք կարծում՝ եթե ես իրավունք չունենայի, իմ լիցենզիան չէի՞ն սառեցնի: Բայց դրա հիմքը չկա, որովհետև ես այստեղ պայմանագրային հիմունքներով եմ աշխատում: Սա հանրային ծառայություն չի համարվում: 

-Պարոն Կարախանյան, լինելով փաստաբան և ԴԱՀԿ ծառայության պետի ժ/պ-ի խորհրդական, շահերի բախում չի՞ առաջանում: Օրինակ՝ եթե այնպիսի գործում ներգրավվեք, որը ԴԱՀԿ-ի դեմ է: Ինչպե՞ս կվարվեք այդ դեպքում: 

-Հասկացա հարցը: Այդքանը հարցրել եք, մնացածն էլ կարող եք հարցնել Պալատից: Ես առնվազն 4 տարի գտնվել եմ ՀՀ-ից դուրս և մասնավոր պրակտիկայով Հայաստանում չեմ զբաղվում: Ճիշտ է՝ ժամանակին նույնիսկ եղել եմ գրասենյակի հիմնադիր, գործող փաստաբան, բայց դա եղել է մինչև 2011 թվականի ավարտը: Այդ ժամանակահատվածից սկսած՝ աշխատել եմ դրսում, աշխատել եմ Եգիպտոսում՝ ՀՀ դեսպանի օգնական: Մասնավոր պրակտիկա՝ որպես այդպիսին, վերջին տարիներին  չեմ ունեցել, հիմա էլ չունեմ: 

-Չեք էլ պատրաստվո՞ւմ ունենալ:

-Ամեն դեպքում՝ այս աշխատանքը բավական ծանրաբեռնված է, նույնիսկ չեմ էլ կարողանալու, այո՛: 

-Այդ դեպում՝ ինչո՞ւ եք մնում Պալատի անդամ, ինչո՞ւ դուրս չեք գալիս Պալատից: Դա Ձեզ ի՞նչ է տալիս: 

-Դա ավելի շատ համոզմունքի խնդիր է: Ես ինձ հոգով համարում եմ այդ կառույցի հետևորդ: Ես իմ աշխատանքային պրակտիկան սկսել եմ փաստաբանությունով, երկար տարիներ աշխատել եմ որպես փաստաբան: Եթե կանգնած չլինեմ փաստաբանությունս դադարեցնելու՝ օրենքի պահանջի առաջ, չեմ դադարեցնելու այն պարզ պատճառով, որ ինձ կոչումով փաստաբան եմ համարում:

Քրիստինա Աղալարյան