Հովհաննեսը հնարավոր է ցանկանա, որ իր ոտքը կտրեն, բայց նա պինդ տղա է. Դավիթ Սանասարյան

«Ի պաշտպանություն Հովհաննես Հարությունյանի» քաղաքացիական նախաձեռնությունը մտահոգ է «Սասնա ծռեր» խմբի անդամ,, փոխհրաձգության հետևանքով հրազենային վիրավորում ստացած՝ Հովհաննես Հարությունյանի առողջական վիճակով:

Այս նախաձեռնությունը պատրաստվում է ամենասեղմ ժամկետում Հովհաննես Հարությունյանի գործն իր դատական և բժշկափորձագիտական ողջ մանրամասներով ներկայացնել Ժնևում ՄԱԿ-ի Խոշտանգումների դեմ կոմիտե` The Committee Against Torture (CAT):

Նախաձեռնության մասնակիցները նաև չեն դադարելու բողոքի ակցիաներ իրականացնել:

Հիշեցնենք՝ նոյեմբերի 7-ին, ՄԻՊ գրասենյակի առաջ, «Ի պաշտպանություն Հովհաննես Հարությունյանի» նախաձեռնության մասնակիցները ներկայացրել են մի շարք պահանջներ: Մասնավորապես, հորդորել են հետևողական լինել հուլիսի վերջին օրերին Ոստիկանության ՊՊԾ գնդի տարածքում հրազենային վիրավորում ստացած՝ «Դատապարտյալների հիվանդանոց» քրեակատարողական հիմնարկի կալանավորված անձ Հովհաննես Հարությունյանի առողջական վիճակի վատթարացման վերաբերյալ: Փոխհրաձգության հետևանքով Հովհաննես Հարությունյանը հրազենային վիրավորում էր ստացել ոտքի շրջանում:

ԼՈՒՐԵՐ.com-ի հետ զրույցում, նախաձեռնության մասնակից Դավիթ Սանասարյանն ասել է, որ նյարդային վիճակից ելնելով` Հովհաննեսը հնարավոր է ցանկանա, որ իր ոտքը կտրեն, բայց նա պինդ տղա է, և բժիշկները ասում են, որ թույլ չեն տա նրա առողջությանը վտանգ սպառնա:

Այսօր տեղի կունենա կոնսիլիում, որի ժամանակ բոլոր հարցերը պատասխաններ կստանան, և ամեն բան պարզ կլինի:
«Ի պաշտպանություն Հովհաննես Հարությունյանի» քաղաքացիական նախաձեռնության մասնակից Դավիթ Սանասարյանը հույսով է, որ առողջապահության նախարարությունը կկազմակերպի Հովհաննեսի բուժումը և «մենք կունենանք առողջ Հովհաննես»:

Խոսելով նաև «Սասնա Ծռերի» մյուս անդամների մասին, Դավիթ Սանասարյանը նշեց.
«Ամենաբարդը Հովհաննեսի վիճակն է: Թեև մյուսներն էլ ապաքինման խնդիրներ ունեն և պետք է այնպես անենք, որպեսզի որևիցե մեկը ուշադրությունից դուրս չմնա»:

Դավիթ Սանասարյանը ցանկանում է Հովհաննեսին առողջ տեսնել, և որ խնդիրներ չլինեն, և քայլեր չիրականացվեն միայն քաղաքացիների  մտահոգությունից հետո:

Հիշեցնենք, որ Հովհաննես Հարությունյանը «Սասնա ծռեր» խմբի այն անդամն է, ում մեղադրանք է առաջադրվել ՀՀ քրեական օրենսգրքի 219 հոդվածի 3-րդ մասի առաջին կետով և 235 հոդվածի 3-րդ մասով:

Նշենք, որ 219-րդ հոդվածի 3-րդ մասի 1-ին կետը սահմանում է՝ շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելը կամ դրանք պահելը՝ զուգորդված՝ դրանք ոչնչացնելու կամ վնասելու սպառնալիքով, որը կատարվել է զավթածն ազատելու պայմանով պետությանը, կազմակերպությանը կամ քաղաքացուն որևէ գործողություն կատարելուն կամ որևէ գործողություն կատարելուց ձեռնպահ մնալուն հարկադրելու նպատակով, որը կատարվել է կազմակերպված խմբի կողմից։

Այս հոդվածով նախատեսվում է ազատազրկում՝ 6-12 տարի ժամկետով:

235-րդ հոդվածի 3-րդ մասը սահմանում է՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը՝ կազմակերպված խմբի կողմից:

Այս հոդվածով նախատեսվում է 3-8 տարի ազատազրկում: