Քրեական հեղինակություն «Քյավառցի Ալիկը» կալանավորվեց

Շենգավիթում աղմկահարույց սպանության գործով «Քյավառցի Ալիկը» երկու ամսով կալանավորվեց:

Արաբկիր-Քանաքեռ-Զեյթուն վարչական շրջանների ընդհանուր իրավասության դատարանը բավարարել է նախաքննական մարմնի միջնորդությունը՝ քրեական հեղինակություն համարվող Ալիկ Բանդուրյանի՝ նույն ինքը՝ քյավառցի Ալիկի նկատմամբ որպես խափանման միջոց կալանավորումն ընտրելու վերաբերյալ:

Ավելի վաղ Քննչական կոմիտեն տեղեկացրել էր, որ քրեական գործով ձեռք բերված ապացույցների համակցությամբ՝ քննիչը որոշում է կայացրել՝ գործով ևս երեք անձի որպես մեղադրյալ ներգրավելու մասին. Ալիկ Բանդուրյանին մեղադրանք է առաջադրվել Մ.Մուշեղյանի սպանությունը դրդելու համար՝ ՀՀ քրեական օրենսգրքի 38-104-րդ հոդվածի 2-րդ մասի 7-րդ կետով, Արմեն Գասպարյանին՝ ՀՀ քրեական օրենսգրքի 335-րդ հոդվածի 1-ին մասով՝ նախապատրաստվող ծանր հանցագործության մասին իմանալ-չհայտնելու համար, Արտակ Նազարյանին՝ ՀՀ քրեական օրենսգրքի 334-րդ հոդվածի 1-ին մասով՝ առանձնապես ծանր հանցագործությունը պարտակելու համար։

Երեկ կալանավորվել էր նաեւ «Բդոն»՝ Արմեն Գասպարյանը։

«Փաստինֆո»