Շիրխանյանի գործով ՄԻՊ-ն իր գնահատականը կտա

Այսօր՝ մամուլի ասուլիսի ձևաչափով լրագրողների հետ հանդիպման ընթացքում, «Նորք-Մարաշի» գործով ձերբակալված Վահան Շիրխանյանի փաստաբան Հայկ Ալումյանը հայտարարել էր Շիրխանյանի առողջական վիճակի ծայրահեղ ծանր լինելու մասին: Ըստ փաստաբանի՝ Շիրխանյանին աստիճանաբար սպանում են:

ԼՈւՐԵՐ.com-ի թղթակիցը փաստաբանի հայտարարությունների վերաբերյալ փորձեց պարզաբանումներ ստանալ Մարդու իրավունքների պաշտպանի խոսնակ Զոհրապ Եգանյանից, արդյոք օմբուդսմանի գրասենյակը տեղյա՞կ է, թե ինչ վիճակում է այսօր Շիրխանյան բանտարկյալը.

«Վահան Շիրխանյանի առողջական վիճակի առնչությամբ Մարդու իրավունքների պաշտպանի աշխատակազմն անընդհատ կապի մեջ է ՀՀ արդարադատության նախարարության հետ: Տեղյակ ենք, որ նախատեսված է իրականացնել ևս մի քանի բժշկական հետազոտություն, որոնց ընթացքին և մանրամասներին Մարդու իրավունքների պաշտպանի աշխատակազմը հետևում է ու դրանց կապակցությամբ կտրվի համապատասխան գնահատական»:

Նշենք, որ ՀՀ ԱՆ ՔԿՎ հանրային կապերի բաժնից էլ հայտարարություն էին տարածել, թե կատարված գործիքային և լաբորատոր հետազոտությունների արդյունքներն ուսումնասիրելով, զննելով հիվանդին, կոնսիլիումը եզրակացրել է, որ ներկա պահին կալանավորված անձ Վահան Շիրխանյանը ստացիոնար բուժման կարիք չունի և շարունակում է ստանալ նշանակված դեղորայքային բուժումը: Նույնաբովանդակ հայտարարություն տարածեց նաև  Արդարադատության նախարարությունը՝ հորդորելով փաստաբանին՝ հավատարիմ մնալ իր մասնագիտությանը, զբաղվել միայն մասնագիտական գործունեությամբ և ոչ թե՝ բժշկությամբ:

Մնում է սպասել և հուսալ, որ օմբուդսմենը հայտարարությունները կուսումնասիրի և Շիրխանյանի առողջական վիճակի մասին այս փոխհրաձգություններից զատ՝ հավաստի տեղեկություն կհաղորդի: