Վահան Շիրխանյանը ստացիոնար բուժման կարիք ունի. փաստաբան

ՊՆ նախկին փոխնախարար Վահան Շիրխանյանի առողջական վիճակն օր օրի ավելի է վատանում: Նրա փաստաբան Հայկ Ալումյանը շարունակում է պնդել, որ Շիրխանյանը ստացիոնար բուժման կարիք ունի:

Հիշեցնենք, որ ՀՀ ԱՆ ՔԿՎ-ից հերքում են այդ լուրերը, իրենց հերթին հավաստիացնելով, թե Վահան Շիրխանյանը ստացիոնար բուժման կարիք չունի:

«Վահան Շիրխանյանի առողջական խնդիրների մոտ ոչ մի դրական փոփոխություն չի նկատվում. նրա վիճակը շարունակում է ծանր մնալ»,- ԼՈՒՐԵՐ.com-ի թղթակցի հետ զրույցում նշեց փաստաբանը:

Հայկ Ալումյանը տեղեկացրեց նաև, որ իրենք դիմել են ՀՀ Մարդու իրավունքների պաշտպանին, որն էլ իր հերթին նոյեմբերի 10-ին որոշում է կայացրել, որ Վահան Շիրխանյանի վիճակը ծանր է, և որ նա պետք է տեղափոխվի քաղաքացիական հիվանդանոց:

«ՄԻՊ-ն արդեն համապատասխան որոշում է կայացրել, որ Վահան Շիրխանյանն անհապաղ պետք է տեղափոխվի հիվանդանոց՝ ստացիոնար բուժման: Ինչն են հերքում, չեմ հասկանում: Մարդու իրավունքների որոշման համաձայն՝ Շիրխանյանն ունի ստացիոնար բուժման կարիք»,- ասաց նա:

Հիշեցնենք, որ Վահան Շիրխանյանը կալանավորվել է ԱԱԾ-ի կողմից Նորք-Մարաշում վնասազերծված խմբավորման գործով՝ դեռևս դեկտեմբեր ամսին, եւ գտնվում է Երևան-Կենտրոն քրեակատարողական հիմնարկում:

Մեր ճշտող հարցին, թե ո՞րն է լինելու հետագա քայլը, եթե ՀՀ ԱՆ ՔԿՎ-ից շարունակեն պնդել, թե Շիրխանյանը ստացիոնար բուժման կարիք չունի և նա չտեղափոխվի քաղաքացիական հիվանդանոց, փաստաբանը հավելեց. «Մենք դիմելու ենք Եվրոպական դատարան»: