Մենեջերից չինովնիկ՝ մեկ քայլ է

Այսօրվա և առաջիկա մի քանի օրերի մամուլի հիմնական քննարկվող և շրջանառվող թեման Կարեն Կարապետյանի ՀՀԿ անդամակցելու մասին փաստն է լինելու: Փորձենք դիտարկել դեպքերի հաջորդականությունը:

Ի սկզբանե, հանրությունը ոգևորված էր Կարապետյանի նշանակմամբ. դա կապված էր գլխավորապես այն հանգամանքի հետ, որ նա տարբերվում էր հայաստանյան լճացած դեմքերից ու մի տեսակ թարմություն էր մտցրել այս պահպանողական գաղջի մեջ: Հենց նշանակման օրվանից՝ շատերը քննարկում էին այն թեզը, որ առաջիկայում վարչապետն անպայման, ինչքան էլ իր գաղափարներով լիբերալ և մոդեռն անհատականություն, թեկուզ պարտադրաբար, կանդամագրվի ՀՀԿ-ին:

Կատարվեց:

Հինգշաբթի՝ Կառավարության նիստից առաջ, Կ. Կարապետյանը հայտարարեց, որ պատրաստվում է կուսակցական դառնալու դիմում ներկայացնել Մելիք-Ադամյան:

Իրականում ի՞նչ ունենք: Ստեղծվել է մի իրավիճակ, երբ նոր, անկուսակցական վարչապետը, ով մինչ այս վարում էր «ինքնուրույն» կադրային քաղաքականություն, ընդամենն ազատվեց նախկին կառավարության կազմում ընդգրկված ՀՀԿ-ական նախարարներից, իսկ հիմա՝ ձեռքի մի շարժումով, իր «պրոֆեսիոնալ մենեջերներին» դարձնում է դարձյալ ՀՀԿ-ական: Հին ՀՀԿ-ական «դեմբելներին» փոխարինեցին «մոլոդոյները», մնացածն ամբողջությամբ նույնն է: Նշանակում է՝ ինչպես նախորդ կառավարություններից հանրությունը ոչինչ չէր ակնկալում, նոր կառավարությունից նույնպես ոչինչ պետք չէ սպասել. նրանք ընդամենը նախորդների գծի շարունակողն են. հայտարարած բարեփոխիչ ու նորարար հայտարարություններն իմիտացիոն ժանրից էին:

Կատարվող երեևույթները, միանշանակ, հասարակության մոտ կառաջացնեն հիասթափության մեծ ալիք, ինչը վարչապետի վարկանիշի վրա կունենա գերբացասական ազդեցություն:

Ամփոփելով, կարող եմ փաստել, որ մենեջերական նոր շունչը լճացած ու կաղապարված ստերիոտիպերով առաջ գնացող քաղաքական ուժի վրա կունենա զրոյական ազդեցություն, քանի որ այն կշարունակի ուղղորդվել Բաղրամյան 26-ից իջեցված «սիգնալներով»:

Սրան գումարած, վարչապետ Կարապետյանը կկորցնի իր իրական կերպարը, և կդառնա դասական կուսակցական չինովնիկ, ով ենթարկվում է կուսակցական բյուրոյում ընդունած ցանկացած որոշմանը: Ստացվում է, որ կայացած և պրոֆեսիոնալ մենեջերը շատ հանգիստ կարող է դառնալ կատարող կուսակցական:

Հետևենք զարգացումներին…