«Կոտրե՛ք ոստիկանական մեքենաները». Անի Զախարյանին մեղադրա՞նք կառաջադրվի

«Նոր քաղաքական մշակույթ» կուսակցության ղեկավար Անի Զախարյանին պատրաստվում են մեղադրանք առաջադրել՝ հուլիսյան դեպքերի օրերին Խորենացի փողոցում տեղի ունեցած բախումների ժամանակ սադրիչ գործողություններ հրահրելու հատկանիշներով:

Հիշեցնենք, որ հուլիսի 19-ին, Խորենացի փողոցում, մի խումբ քաղաքացիներ կոտրել էին ոստիկանական մեքենայի հետևի ապակին:

Այդ գործով՝ Անի Զախարյանը ներգրավված է որպես վկա:

Հինգ ոստիկան, սակայն, ցուցմունք է տվել, թե վերջինս հանդես է եկել կոչով՝ «կոտրե՛ք ոստիկանական մեքենաները»:

ԼՈՒՐԵՐ.com-ի թղթակցի հետ զրույցում Անի Զախարյանը նշեց՝ չկա որևէ հիմք, որի միջոցով կապացուցվի, որ ինքը նման կոչ է արել:

«Դա ոստիկանների կեղծ ցուցմունք է, այն էլ՝ այնպիսի ոստիկանների, ովքեր անգամ օրենսդրությանը չեն տիրապետում: Եվ հիմա, նման անգրագետ անձինք' «տոլի», «ոնց որ», «այսպես ենք հիշում», կցկտուր արտահայտություններով պնդում են' իբրև թե ես եմ ասել՝ «կոտրե՛ք ոստիկանական մեքենաները»»,- ասաց Անի Զախարյանը:

Այն հարցին՝ արդյոք քաղաքական միտում չի՞ տեսնում ինքն այս հարցում, Անի Զախարյանը պատասխանեց. «Միանշանակ տեսնում եմ: Այդ գործով ես առայժմ որպես վկա եմ ներգրավված: Բայց, քանի որ վստահություն չունեմ իրավապահ մարմինների անաչառության նկատմամբ, բնականաբար, գիտակցում եմ' որքան քաղաքական գործչի, առավել ևս՝ ընդդիմադիր գործչի գործունեությունը լրջանում է, այնքան ավելանում են կոմպրոմատ որոնելու հնարավորությունները: Մտավախություն ունեմ, որ գուցե սրա հետևում ինչ-որ մարդիկ են կանգնած, ովքեր արհեստական՝ ցանկանում են մեղադրանք ներկայացնել»:

Անի Զախարյանի խոսքով՝ կա մի տեսանյութ, որտեղ լսվում է ինչ-որ կնոջ ձայն: Եթե հաստատվի, որ դա իր ձայնն է, իրեն մեղադրանք կառաջադրվի՝ զանգվածային անկարգություններ հրահրելու համար:

«Ես հանրայնացրի այս հարցը, որպեսզի գործն ընթանա հանրության և լրատվամիջոցների աչքերի առջև և ծածկադմփոց կամ արհեստական որևէ բան ստեղծելու հնարավորություն չունենան: Ճիշտ է' ես եղել եմ Խորենացի փողոցում, բայց նման արտահայտություն չեմ արել»,- վստահեցրեց Անի Զախարյանը:

«Նոր քաղաքական մշակույթ» կուսակցության ղեկավարն իր վրդովմունքն արտահայտեց այն մասին, որ գնալով ավելանում է քաղբանտարկյալների թիվը, իսկ թե ի՞նչ ընթացքի մեջ են մարդկանց մասսայական բերման ենթարկելու, նռնակներ նետելու, 16 տարեկան պատանու աչքը հանելու գործերի քննությունը՝ ոչ ոք չգիտի:

Սոնա Հարությունյան