«Սա իմ վերջին գրառումն է ֆեյսբուքում». Մահացել է բանաստեղծ Անահիտ Բոստանջյանը

Այսօր Թբիլիսիում մահացել է բանաստեղծ, թարգմանիչ, հրապարակախոս, լրագրող Անահիտ Բոստանջյանը: 

Բոստանջյանը ծնվել է 1949 թվականին, Թբիլիսիում: 1972թ. ավարտել է Գյումրիի Միքայել Նալբանդյանի անվան մանկավարժական ինստիտուտի Հայոց լեզվի և գրականության ֆակուլտետը։

1988 թվականից ՎԳՄ «Կամուրջ» տարեգրքի գլխավոր խմբագիրն է եղել, իսկ 1994թ. աշխատել է «Վրաստան» թերթում: Անահիտ Բոստանջյանը հեղինակ է 30-ից ավելի գրքերի, թարգմանել է վրացի գրողների բազմաթիվ ստեղծագործություններ:

Թբիլիսիի «Հայարտուն» կենտրոնի խորհրդի անդամ էր, Վրաստանի և Հայաստանի գրողների միությունների անդամ, Քալիֆորնիայի Հայ գրողների միության պատվավոր անդամ, Վրաստանի գրողների միության հայկական վերաբացված մասնաճյուղի նախագահ։

Ստորև ներկայացնում ենք Անահիտ Բոստանջյանի ֆեյսբուքյան վերջին գրառումը.

«Խե՜ղճ հայոց լեզու....Ով ինչպես ուզում, հերդ անիծում է..Մեկը՝ բանավոր խոսքով, մյուսը գրավորով, մեկը՝ բանաստեղծությամբ, մեկը՝ թարգմանությամբ, մեկը՝ լրագրությամբ, մեկը՝ եթերից, մեկը՝ քաղաքական ամբիոնից, մեկը՝ հոգևոր դաշտից, մեկը՝ արատավոր ու մեղսալի լռությամբ այս ամենի հանդեպ....

Սա իմ վերջին գրառումն է ֆեյսբուքում .... Այս թեմայով..Կհավաքեմ խաթարված-աղճատված քո բոլոր «դեմքերը» ու առանձին մի գիրք կհրատարակեմ ՝ «Ողբ հայոց լեզվի» վերնագրով....Ու այստեղ արդեն ամեն ինչ անուն առ անուն կլինի»: