Վրաստանը եւ «Գազպրոմ»-ը համաձայնություն են ձեռք բերել Հայաստան գազի տարանցման պայմանների շուրջ

«Գազպրոմ-Էքսպորտ» ԲԲԸ-ի հետ ձեռք բերված պայմանավորվածության համաձայն՝ Վրաստանն անհրաժեշտության դեպքում Ռուսաստանից գազը կստանա ոչ թե հազար խորանարդ մետրը 215 դոլար գնով, այլ 185 դոլարով: Այդ մասին հունվարի 11-ին կայացած բրիֆինգում հայտնել է հանրապետության էներգետիկայի նախարար Կախա Կալաձեն:

«Կառավարությունը քննարկեց այդ առաջարկը եւ որոշում ընդունեց ձեւակերպել պայմանագիրը: Այդ պայմանագրով, ցանկանում եմ ընդգծել, ռուսական էներագակիրներից Վրաստանի կախվածությունը չի մեծանում: Փոխվում է միայն վճարման ձեւը, ինչը նշանակում է հումքով վճարելուց անցում դրամական վճարման՝ միջազգային պրակտիկային համապատասխան»,- ասել է Կալաձեն կառավարության նիստից հետո:

«Ինչ վերաբերում է տարանցման արժեքին, որը պետք է վճարվի Վրաստանին, այն ամենաբարձրերից մեկն է եվրոպական երկրների թվում»,- ընդգծել է նախարարը: Կալաձեն նշել է, որ «Գազպրոմ»-ի հետ ձեւակերպվելու է երկամյա համաձայնագիր:

«Համաձայնագիրը կարճաժամկետ է՝ երկամյա, սակայն առաջին տարում հումքով վճարելու ձեւը մասամբ կպահպանվի, իսկ հետո կփոխարինվի դրամական վճարմամբ՝ միջազգային պրակտիկային համապատասխան: Անհրաժեշտության դեպքում, եթե մենք լրացուցիչ ծավալներով գազ ստանալու կարիք ունենանք, գինը 215 դոլարի փոխարեն կկազմի 185 դոլար»,- հավելել է Կալաձեն:
«Գազպրոմ-Էքսպորտ»-ի հետ Վրաստանի պայմանագրի ժամկետը, որը վերաբերում է Հայաստան բնական գազի տարանցմանը, լրացել է հունվարի 1-ին:

Վրաստանը որպես գազի տարանցման դիմաց վճար ստանում է Հայաստանին մատակարարվող ռուսական գազի ընդահուր ծավալի 10 տոկոսը: Փաստաթուղթը ձեւակերպվել է 2016 թվականի ապրիլին՝ վերջին համաձայնագրի ժամկետի լրանալուց երեք ամիս անց: Բանակցությունները ձգձգվել էին այն պատճառով, որ «Գազպրոմ»-ը պնդում էր տարանցման դիմաց վճարել ոչ թե գազով, այլ փողով:
Վրաստանը ռուսական գազ չի գնում 2007 թվականից: Հանրապետությանը գազի հիմնական մատակարարն Ադրբեջանն է, որը 2016 թվականի մարտի սկզբին համաձայնել է ավելացնել մատակարարումների ծավալը: