ԱՄՆ-ը մեղադրում է Ռուսաստանին դեմոկրատական գործընթացի խախտումներում

ԱՄՆ պետդեպարտամենտն աշխարհում մարդու իրավունքների վիճակի վերաբերյալ տարեկան զեկույցում կրկին քննադատության է ենթարկել Ռուսաստանին՝ շեշտը դնելով 2011-ի խորհրդարանական ընտրությունների անցկացման խնդիրների վրա, որոնք, ըստ զեկույցի, դեմոկրատական գործընթացի խաթարման ամենավառ օրինակն են։ Այս մասին գրում է BBC Russian-ը։

«ՌԴ և միջազգային դիտորդները ուշադրությունը հրավիրում էին իշխանությունների ներգրավվածության, մեքենայությունների վրա, ինչպես նաև ընդդիմադիր կուսակցությունների թեկնածուների գրացման, ԶԼՄ-ներում ներկայացվելու և նախընտրական արշավ իրականացնելու խոչընդոտների վրա», - ասվում է զեկույցում։

ԱՄՆ արտաքին քաղաքականության վարչությունն ուշադրությունն է դարձնում իրավապահ և դատական մարմինների վիճակին, մասնավորապես նրան, որ «հզոր պետական կամ բիզնես-հետաքրքրությունների համար վտանգ ներկայացնող անձինք ենթարկվում են քաղաքական հետապնդումների և կալանքի տակ հայտնվելու դեպքում պահվում դաժան պայմաններում»։

ՌԴ-ում բանտերի վիճակն ինքնին ներկայացվում է որպես մարդու իրավունքների առանձին ոտնահարում, քանի որ բազմաթիվ բանտարկյալներ բախվում են անբավարար բժշկական սպասարկման, կենցաղային տարրական պայմանների բացակայության և ղեկավարության կողմից դաժան վերաբերմունքի հետ, որոնք կարող են հանգեցնելու մարդու մահվան։

Հատուկ ուշադրություն է դարձվել նաև Հյուսիսային Կովկասում իրավիճակին, «ուր իշխանությունների և ապստամբների, իսլասմիստ-գրոհայինների ու քրեական տարրերի միջև կոնֆլիկտը հանգեցրել է մարդու իրավունքների համատարած խախտման ինչպես գրոհայինների, այնպես էլ իրավապահ մարմինների աշխատակիցների կողմից»։

Ինչ վերաբերում է Չեչնիային, ըստ զեկույցի հեղինակների՝ «Ռամզան Քադիրովի կառավարությունը շարունակում է խախտել ազատության հիմնարար սկզբունքերը, մասնակցում է գրոհայինների հետ համագործակցության մեջ կասկածվողների ընտանիքների հանդեպ վրիժառության կոլեկտիվ գործողություններին և նպաստում ահաբեկման և վախի մթնոլորտի ստեղծմանը»։

Այս և բազմաթիվ այլ հարցեր, նվիրված Ռուսաստանում խոսքի, հանրահավաքների, ԶԼՄ-ների ազատությանը, բերված են զեկույցում։ ԱՄՆ պետքարտուղար Հիլարի Քլինթոնը հայտարարել է, որ սա «ազդանշան է երկրների կառավարություններին» և կոչ է արել անհատներին և ակտիվիստներին չհուսահատվել։