Արևմուտքը միջուկային ծրագրի պատճառով սպառնում է Իրանին

Իրանի և «Վեցնյակի» միջև Մոսկվայում կայացած երկօրյա բանակցությունների ընթացքում միջազգային միջնորդներին չի հաջողվել Իրանի միջուկային ծրագրի շուրջ բանակցային կողմերի դիրքորոշումները մոտեցնել իրար, հաղորդում է BBC Russian–ը։

Բանակցությունների արդյունքների վերաբերյալ ամփոփիչ ելույթում Ֆրանսիայի ԱԳՆ–ն Իրանի նկատմամբ պատժամիջոցներն ուժեղացնելու կոչ է արել, մինչդեռ ԵՄ Արտաքին հարաբերությունների գերագույն հանձնակատար Քեթրին Էշթոնը հայտարարել է, որ Թեհրանն «առաջին անգամ է մտնում քննարկման բուն էության մեջ»։ 

Բանակցություններին իրանական կողմը ներկայացրել է Ազգային անվտանգության գերագույն խորհրդի քարտուղար Սաիդ Ջալիլին։ Թեհրանի միջուկային ծրագրի շուրջ Մոսկվայում ընթացող բանակցությունների «Վեցնյակը» ներկայացնում էին ՄԱԿ–ի Անվտանգության խորհրդի անդամ 5 երկրները և Գերմանիան։ 

«Վեցնյակը» փորձում էր Իրանին համոզել հրաժարվել ուրանի՝ 20%–ից ավելին հարստացման ծրագրից, քանի որ նմանաչափ հարստացումը չի կարող խաղաղ նպատակների համար ծառայել։ Սակայն Իրանը ցանկանում է շարունակել ուրանի հարստացումը և հասնել համաշխարհային տերությունների հետ գրավոր համաձայնագրի կնքման, որով կհաստատվի խաղաղ նպատակներով Իրանի միջուկային ծրագրի զարգացումը։