Նավթային էմբարգոն ու Էմիր Ալի Հաջիզադեի սպառնալիքը

Այսօրվանից ուժի մեջ է մտնում Եվրոպական Միության կողմից իրանական նավթի վրա սահմանված էմբարգոն, այս մասին տեղեկացնում է իրանական Մեհր» գործակալությունը։

Տնտեսագետների գնահատականներով՝ դա կարող է կրկնակի չափով կրճատել Իրանի՝ վառելիքից ստացվող եկամուտները:

Իրանի Կենտրոնական բանկի ղեկավար մահմուդ Բահմանին այսօր հայտարարել է, որ երկիրը պատրաստ է դիմակայել Արևմուտքի պատժամիջոցներին պահուստային մոտ 150 մլրդ դոլար միջոցների հաշվին:

Նա նշել է, որ գումարի այդ չափը կբավարարի պատժամիջոցներին դիմակայելու համար:

ԵՄ այս պատժամիջոցները ամենախիստն են Իրանի միջուկային ծրագրերի շուրջ ծավալված հակամարտության ամբողջ ընթացքում: Դրանք տարածվում են ոչ միայն իրանական նավթահումքի և նավթամթերքի գնման վրա, այլև արգելում են այն նավերի ապահովագրումը, որոնք կտեղափոխեն դրանք:

Որոշ տվյալներով, իրանական նավթի արտահանումն այս տարի արդեն կրճատվել է 40 տոկոսով:

Այս ամենի համատեքստում Իրանի Օդային ուժերի հրամանատար Էմիր Ալի Հաջիզադեն հայտարարել է, որ Իսրայելի կողմից Իրանի վրա ցանկացած հարձակման դեպքում իրենք քարտեզից կջնջեն Իսրայել պետությունը:

«Սիոնիստական ռեժիմը բավականաչափ ուժ չունի Իրանի վրա հարձակվելու համար, եթե այդքան ուժեղ լիներ, անգամ մի պահ չէր հապաղի»,- ասել է նա:

Զինվորական բարձրաստիճան պաշտոնյան հիշեցրել է Իսրայելի և Հզբոլլահի միջև տեղի ունեցած 33 օրյա պատերազմը և նշել, որ հրեաները անգամ լիբանանյան Հզբոլլահի նման փոքրիկ խմբի դեմ անհաջողության մատնվեցին և չեն կարողանա հարձակվել Իրանի վրա:

Նա համոզմունք է հայտնել, որ ԱՄՆ-ը ևս չի օգնի Իսրայելին, քանի որ Վաշինգտոնը չի ցանկանա նման բեռի տակ մտնել:

«Նրանք նման համարձակություն չունեն: Եթե սիոնիստական ռեժիմը նման մեծ սխալ գործի, միանաշանակ կվերանա: Մենք նրան կջնջենք աշխարհի երեսից»,- ասել է Իրանի oդային ուժերի հրամանատար Էմիր Ալի Հաջիզադեն։