Իրանը 14 միլիարդ դոլար է տրամադրելու նավթագազային ոլորտը զարգացնելու համար

Իրանը ներդնելու է 14 միլիարդ դոլար նավթագազային ոլորտում, որպեսզի հաղթահարի իր նկատմամբ եվրոմիության երկրների և ԱՄՆ-ի բացասական տնտեսական պատժամիջոցները, հաղորդում է Shana գործակալությունը՝ հղում կատարելով Իրանի նավթի նախարար Ռուստամ Քաշեմին։

Գումարը դուրս է գրվելու Իրանի զարգացման ազգային հիմնադրամից։ Քաշեմին նշել է, որ առաջիկա 5 տարիներին նավթագազային ոլորտում պլանավորված է ներդնել տարեկան 50 միլիարդ դոլար։ Նախարարը հավելել է, որ նավթագազային ոլորտը ֆինանսավորելու համար հիմնադրամի մասնաբաժինը չի գերազանցելու 20 տոկոսը։

Իր խոսքերով, ներդրման անհրաժեշտություն է առաջացել այն պատճառով, որ գումարային միջոցների հոսքը Իրանի հանքարդյունաբերության ոլորտում բարդացել է։ «Այս ներդրումները ցույց են տալիս, որ երկիրը ունի բավարար ֆինանսական ռեսուրսներ՝ հաղթահարելու միջազգային պատժամիջոցները և շարունակելու նավթագազային ոլորտի զարգացումը»,- ամփոփել է Քաշեմին։ Եվրամիության պատժամիջոցները Իրանի նկատմամբ սկսել են գործել հուլիսի 1-ից։ Եվրոպական երկրներն Իրանից նավթ չեն գնելու։ ԱՄՆ-ը Թեհրանի նկատմամբ նման որոշում ավելի վաղ էր կայացրել։

Իրանը հայտարարել է, որ առանց նավթի արտահանման, երկիրը կարող է դիմանալ ավելի քան 3 տարի։

Միջազգային պատժամիջոցներն Իրանի նկատմամբ կիրառվեցին այն բանից հետո, երբ Եվրոմիությունը և ԱՄՆ-ը կասկած հայտնեցին, թե Իրանը միջուկային զենք է մշակում։ Թեհրանը մեկ անգամ չէ, որ հայտարարել է, թե իր միջուկային ծրագիրն ուղղված է միայն ատոմային էներգետիկայի զարգացմանը և գործում է խաղաղ նպատակներով։