ԱՄՆ–ը ստորջրյա սարքեր է ուղարկում Պարսից ծոց Իրանին դիմակայելու համար. Los Angeles Times

ԱՄՆ–ի ռազմածովային ուժերը ռազմական գործողությունների ժամանակ հեռակառավարման վահանակի միջոցով SeaFox տեսակի ստորջրյա սաքեր են ուղարկում Պարսից ծոց ականներ հայտնաբերելու և ոչնչացնելու համար։ ԱՄՆ–ի զինուժի նման նախաձեռնությունը նաև նպատակ ունի ճգնաժամի դեպքում Իրանին հնարավորություն չտալ վերահսկել Օրմուզի ռազմավարական նշանակությունը ունեցող նեղուցը,-գրում է Los Angeles Times–ը։   

Ստորջրյա սարքերից յուրաքանչյուրն ունի 2 մետր երկարություն և առնվազն 100 ֆունտ ծանրություն, սարքն ունի նաև ստորջրյա տեսադիտման համակարգ, պայթուցիկ սարքեր վնասազերծելու հնարավորություն։ Առաջին անգամ ստորջրյա սարքերը Պարսից ծոց ուղարկվել են վերջին շաբաթների ընթացքում, որոնց հետ ուղարկվել են նաև 4 ուղղաթիռներ և 4 ականորսիչներ։

«ԱՄՆ–ի որոշ քաղաքական գործիչներ մտահոգություն ունեն, որ Իրանը կարող է կտրուկ քայլերի դիմել՝ ի պատասխան Արևմուտքի կողմից բանկային և էներգետիկ ոլորտներում պատժամիջոցներ կիրառելուն։ Վերջիններս չեն բացառում, որ Իրանի թիրախ կարող են դառնալ Պարսից ծոցով անցնող ԵՄ անդամ երկրների նավթային տանկերները», – գրում է Los Angeles Times–ը։ 

ԵՄ–ի կողմից Իրանի դեմ նավթային էմբարգո կիրառելու որոշումը հուլիսի 1–ից լիարժեք ուժի մեջ մտնելուց հետո իրանցի որոշ բարձրաստիճան պաշտոնյաներ սպառնացել են նեղուցի ջրային հատվածները փակել։