Զարթոնքում կրակոցներից վիրավորներ կան. գյուղացիները փակել են երկաթգիծը

Այսօր՝ ապրիլի 13-ի վաղ առավոտյան, ոստիկանության Մեծամորի բաժնում ահազանգ է ստացվել, որ Զարթոնք գյուղում մի խումբ անձանց մասնակցությամբ միջադեպ է տեղի ունեցել. մասնակիցներից մեկը որսորդական հրացան է գործադրել։ Այս մասին ԼՈւՐԵՐ.com-ի հետ զրույցում ասաց ոստիկանության լրատվության վարչության պետ Աշոտ Ահարոնյանը:

«Ահազանգին արագ արձագանքած ոստիկանության Մեծամորի բաժնի ծառայողները կանխել են միջադեպի հնարավոր անդառնալի հետևանքները։ Բացի այդ, ոստիկանները վնասազերծել են հրացան գործադրած անձին, նրան և միջադեպի մի քանի մասնակիցների բերման են ենթարկել բաժին։ Միջադեպի մասնակից հինգ անձ դիմել է բուժօգնության։ Նրանցից երկուսի վնասվածքը, նախնական վարկածով, առաջացել է որսորդական փամփուշտի կոտորակից»,-ասաց նա՝ նշելով, որ տեղում ոստիկանության մի շարք ստորաբաժանումների ծառայողներ վերահսկում են օպերատիվ իրավիճակը:

Նշենք, որ կրակոցներն արձակել է Արմավիրի մարզի Զարթոնքի գյուղապետ Պարույր Սարգսյանի թոռը՝ 27-ամյա Նարեկ Մելքոնյանը:

Մեզ հետ զրույցում Պարույր Սագսյանն էլ պատմեց, թե ցուցարարներն առավոտյան հարձակվել են իր աղջկա՝ Մանուշ Սարգսյանի տան վրա, իր թոռն էլ պաշտպանվելու համար որսորդական հրացանից մի քանի անգամ կրակել է օդ. «Կրակել է, որովհետև 50 հոգով հասել են աղջկաս տան վրա, կոտրել են դուռն ու պատուհանները, թոռս էլ վախեցել է, ու պաշտպանվելու համար սկսել է կրակել օդ, բայց կրակոցը հակադարձել ու կպել է մեկի ոտքին»,- ասաց նա՝ ավելացնելով, որ այս պահին ոստիկանները գյուղում են և փորձում են հանդարտեցնել բախումները:

Գյուղապետը ևս մեկ անգամ նշեց, որ չի պատրաստվում հրաժարական տալ:

Հիշեցնենք, որ Արմավիրի մարզի Զարթոնք համայնքի բնակիչները բողոքի ակցիաներ էին անում՝ պահանջելով 23 տարվա գյուղապետ Պարույր Սարգսյանի հրաժարականը: Նրանք փակել են Երևան-Գյումրի երկաթգիծը։

Գյուղապետը հայտարարել էր, որ մի քանի հոգու պահանջով հրաժարական տալ չի պատրաստվում, եթե իրեն ներկայացնեն 450-500 ստորագրությամբ պահանջ, ապա հրաժարական կտա:  Համայնքի բնակիչները հավաքել էին 500-ից ավելի ստորագրություններ, սակայն գյուղապետը հրաժարական չէր տվել՝  պատճառաբանելով, որ դրանք կեղծված են:

Բացի այդ, բնակիչները պահանջել էին ստուգումներ անցկացնել դպրոցում, քանի որ տնօրենը գյուղապետի դուստրն է: Երբ տեսուչները գնացել են դպրոց, համայնքի բնակիչները շտապել են այնտեղ, որի հետո բախում է սկսվել նրանց և դպրոցի աշխատակիցների միջև: Գյուղացիները պնդում են՝ տնօրեն Մանուշ Սարգսյանը հայհոյել է գյուղի կանանց:

Սոնա Հարությունյան