Պատժամիջոցներն օրական $133 մլն-ի վնաս են հասցնում Իրանին

2012թ.-ի հուլիսի 1-ից Իրանը 1.2 մլն բարելով կրճատել է նավթի մատակարարման օրական ծավալները, որը, մինչև ԱՄՆ-ի՝ Իրանի նկատմամբ պատժամիջոցների կիրառումը, Իրանի մատակարարվող նավթի ծավալների 52%-ն էր կազմում: Այդպիսի կրճատումները Իրանի կառավարությանը կարող է տարեկան 48 մլրդ. ԱՄՆ դոլարի վնաս հասցնել, ինչը կազմում է Իրանի ՀՆԱ-ի 10%-ը:

2012թ.-ի սկզբին Հորմուզի նեղուցի փակման վերաբերյալ Իրանի սպառնալիքները բերեցին նավթի գների կտրուկ բարձրացման, սակայն Սաուդյան Արաբիայի նավթի արդյունահանման ծավալների մեծացումը, ԱՄՆ-ի նավթարդյունահանման բումը և էներգակիրների պահանջարկի՝ ճգնաժամի պատճառով նվազումը նպաստեցին նավթի գների կայունացմանը:

Societe Generale ֆինանսական կորպորացիայի ներկայացուցիչ Մայք Ուիթները ստեղծված իրավիճակը համարում է ԱՄՆ-ի այժմյան նախագահ Բարաք Օբամայի արտաքին քաղաքական մաքուր հաղթանակ: Նա խուսափում էր ԱՄՆ-ի ներքին շուկայում նավթի գների թանկացումից, ինչն այս տարվա նոյեմբերին կայացող ընտրությունների վրա լավ անդրադարձ չէր ունենա: ԱՄՆ-ն հույս ունի,որ Իրանի նկատմամբ նշանակված պատժամիջոցների տնտեսական էֆեկտը կստիպի Իրանին կհրաժարվել ատոմային ծրագրի իրականացումից՝ առանց ռազմական ուժերի կիրառման:

Ըստ մասնագետների գնահատականի, այսօր Իրանը օրական 1.1 մլն. բարել նավթ է արտահանում: Անցյալ տարի օրական արտահանումների միջին թիվը կազմել էր 2.2 մլն բարել: Իրանի ֆինանսական կորուստները հանգեցրել են իրանական ռիալի՝ դոլարի նկատմամբ նվազեցմանը, որն անցյալ տարվա նոյեմբերից նվազել է երեք անգամ: Այս տարվա հունիսին Իրանի միջին տարեկան ինֆլյացիան գերազանցել է 22%-ը, գործազրկության մակարդակը՝ 13%-ը, իսկ ՀՆԱ-ի մակարդակը նվազել է 0.4%-ով: