«Ես պարզապես մասնակցել եմ Թեհրանի կոնֆերանսին». Իրանում Հայաստանի դեսպան

Թերանում տեղի է ունեցել Սիրիային նվիրված գագաթաժողով-կոնֆերանս: Այդ մասին հայտնում է  երկրի պաշտոնական Իրնա գործակալությունը: Հանդիպումը եղել է Իրանի Իսլամական Հանրապետության արտաքին գործերի նախարարության նախաձեռնությամբ, այն վարել է արտաքին գործերի նախարար Ալի Ակբար Սալեհին:

Կոնֆերանսի արդյունքում ընդունված հայտարարության մեջ ասվում է, որ սիրիական հարցի լուծումը պիտք է կառուցվի բացառապես միջազգային իրավունքի, երկրի ներքին հարցերին չմիջամտելու, Սիրիայի սուվերենության հարգման և տարածքային ամբողջականության անխախտելիության սկզբունքների հիման վրա:

Հայտարարությունը կոչ է անում կողմերին դադարեցնել զինված ընդհարումները և հող նախապատրաստել ազգային բանակցությունների համար:

Գագաթաժողովին մասնակցել են  Հայաստանի, Բելառուսի, Մավրիտանիայի, Ինդոնեզիայի, Ղրղզստանի, Վրաստանի, Թուրքմենստանի, Շրիլանկայի, Էկվադորի, Աֆղանստանի, Պակիստանի, Ալժիրի, Իրաքի, Զիմբաբվեի, Օմանի, Վենեսուելայի, Տասջիկստանի, Հնդկաստանի, Ռուսաստանի, Չինաստանի, Ղազախստանի,  Նիկարագուայի, Կուբայի, Հորդանանի, Թունիսի, Սուդանի, Պաղեստինի և ՄԱԿ-ի ներկայացուցիչները: Հանդիպմանը ներկա չեն գտնվել արաբական մի շարք երկրների, Թուրքիայի, Ադրբեջանի, ինչպես նաև ԵՄ անդամ երկրների ներկայացուցիչներ:

Lurer.com-ի հետ զրույցում Իրանում ՀՀ դեսպան Գրիգոր Առաքելյանը, ով կոնֆերանսում ներկայացրել է Հայաստանը, փոխանցեց, որ մասնակից երկրները որևէ փաստաթուղթ չեն ստորագրել. «Ես պարզապես մասնակցել եմ Թեհրանի կոնֆերանսին»,-փոխանցեց պարոն դեսպանը։