Ամփոփ տեղեկություններ Իրանի երկրաշարժից. վերջին տվյալներով 180 մարդ է զոհվել, վիրավորվել՝ 1300. (ԹԱՐՄԱՑՎԱԾ, տեսանյութեր)

Այսօր երևանյան ժամանակով 16:23-ի կողմերն Իրանի հյուսիս-արևմուտքում՝ Ահար քաղաքից 16 կիլոմետր հեռավորության վրա, տեղի է ունեցել երկրաշարժ երկու խոշոր ցնցումով՝ Ռիխտերի սանդղակով 6,2 և 6,4 ուժգնությամբ: Երկրաշարժի մասին տեղեկությունները հաստատել են USGS ծառայությունն ու Իրանի Երկրաբանական Ծառայությունը: Գրանցվել են նաև հետցնցումներ՝ համապատասխանաբար Ռիխտերի սանդղակով 5,9 և 5,4 բալ ուժգնությամբ:

Երկրաշարժի էպիկենտրոնի անմիջական հարևանությամբ գտնվում է Վարզեղան իրանական քաղաքը: Earthquake Report անկախ ծառայության տվյալներով, Վարզեղանում խիստ վնասվել են կավե տները, տուժածներին տեղափոխում են հիվանդանոցներ:

BBC հեռուստաընկերությունը հայտնում է 80 զոհերի ու մոտ 400 վիրավորների մասին, իսկ RTE-ի տվյալներով զոհերի քանակն արդեն հասել է 87-ի:

ԹԱՐՄԱՑՈՒՄ. Իրանական պետական հեռուստաընկերության տվյալներով զոհերի քանակը հասել է 180-ի, վիրավորներինը՝ 1300-ի: Առավել մանրամասն կարող եք տեղեկանալ հետևյալ աղբյուրից:

khakestaar.blogspot.de իրանական բլոգում տեղադրված տվյալներով Իրանի Իսլամական Հանրապետության խորհրդարանում Վարզեղանի ներկայացուցիչը հայտնել է, որ քաղաքն ու մերձակա գյուղերի մեծ մասը խոշոր վնասներ են կրել ու փրկարարները չեն կարողանում հասնել դեպքերի վայր:

Earthquake Report-ը նշում է երկրաշարժի մակերեսային բնույթը (USGS-ի տվյալներով երկրաշարժի հիպոկենտրոնի խորությունը կազմում է մոտ 9 կիլոմետր) ու տարածաշրջանի խիտ բնակեցված լինելը (մոտ 1 միլիոն մարդ): USGS-ի տրամադրած երկրաշարժի ազդեցության և ուժգնության քարտեզում  կարող ենք տեսնել, որ էպիկենտրոնն ընկնում է նարնջագույն գոտու մեջ (միջին/ծանր ավերածություններ ու զոհեր), իսկ հայ-իրանական սահմանին մոտ գտնվող Մեղրի քաղաքն ու հարակից գյուղերն ընկնում են կանաչ գոտու մեջ (թեթև ավերածություններ/ավերածությունների բացակայություն): Իրանական խոշոր Թավրիզ քաղաքը գտնվում է դեղին և կանաչ գոտիների սահմանում:

Ականատեսների վկայություններով ու ՀՀ Արտակարգ Իրավիճակների Նախարարության տվյալներով երկրաշարժը զգալի է եղել նաև Հայաստանի տարածքում: Ուժեղ ցնցումներ են եղել Կապան ու Մեղրի քաղաքներում, բայց, այս պահի տվյալներով, զոհեր ու ավերածություններ չեն եղել:

Hayland.am սոցիալական ցանցի օգտատեր Արաքս Հակոբյանը գրառում է կատարել Մեղրի քաղաքի շրջակայքում գտնվող Ագարակ գյուղում իրավիճակի մասին, որի մեջ նշել է.

«ԱՐԱՔՍ ՀԱԿՈԲՅԱՆ 8/11/2012 5:38:51 PM:
Շատ վախենալու էր
մենք առաջին հարկում ենք, մենք շուտ դուրս վազեցինք, 3 ուժգին ցնցում եղավ, երրորդն ահավոր էր, ձայնով ու երկար տևեց, սարերից էլ բեկորներ էին թափվում, ողջ թաղամասը վայնասուն էր, եթե նույնը կրկնվի, մեր կողքի շենքը կփլվի, լրիվ ճաքճքել է»:

Իրանական Ուսանողների Նորությունների Գործակալությունը տեղադրել է առաջին կադրերը դեպքի վայրերից

Երկրաշարժի բնութագիրն ըստ USGS ծառայության.

Ուժգնությունը 6.4 բալ ըստ Ռիխտերի սանդղակի
Ժամանակը
Շաբաթ, 11 Օգոստոսի, 2012 ժամը 12:23:17 UTC (14:23 ըստ հայկական ժամանակի)
Շաբաթ, 11 Օգոստոսի, 2012 ժամը 03:53:17 PM էպիկենտրոնի ժամանակով
Կոորդինատները 38.322°N, 46.888°E
Խորությունը 9.9 կմ
Տարածաշրջանը Հյուսիս-արևմտյան Իրան
Հեռավորությունը մոտակա խոշոր բնակելի վայրերից
20 կմ հարավ-արևմուտք Ահարից
60 կմ հյուսիս-արևելք Թավրիզից
95 կմ արևելք Մարանդից
100 կմ հարավ-արևելք ՀՀ Կապան քաղաքից

Բայանդուր Պողոսյան