Իրանում երկրաշարժերի հետևանքով զոհվածների թիվը մոտեցել է 250-ին

Շուրջ 250 մարդ է մահացել, ավելի քան 1,5 հազար մարդ էլ՝ վիրավորվել՝ Իրանի հյուսիս–արևմուտքում տեղի ունեցած 2 երկրաշարժերի հետևանքով։ Երկրաշարժերից տուժած «Արևելյան Ադրբեջան» անվանումը կրող նահանգի իշխանությունները չեն բացառել, որ զոհերի թիվը կարող է աճել։

Փրկարարները շարունակում են կենդանի մնացածների որոնումները՝ ավերակ դարձած շինությունների փլատակների տակ։ Անցած գիշեր հազարավոր մարդիկ անցկացրել են բաց երկնքի տակ՝ վրաններում։

Իրանական «Կարմիր կիսալուսնի» ներկայացուցչի խոսքերով՝ ավելի քան 16 հազար մարդ ստիպված է եղել հեռանալ իրենց տներից և ներկայումս գտնվում է ժամանակավոր կացարաններում։

Հիշեցնենք, որ երեկ իրանական Թավրիզ քաղաքի մոտակայքում 2 երկրաշարժ է տեղի ունեցել՝ 6,4 և 6,3 մագնիտուդ ուժգնությամբ։