Իրանում երկօրյա սուգ է հայտարարված ի հիշատակ օգոստոսի 11-ի երկրաշարժի զոհերի

Իրանի Արևելյան Ադրբեջան գավառի իշխանությունները երկուշաբթի և երեքշաբթի օրերը՝ օգոստոսի 13-ը և օգոստոսի 14-ը, հայտարարել են սգո օրեր ի հիշատակ օգոստոսի 11-ի ավերիչ երկրաշարժերի զոհերի: Այս մասին հաղորդում է РИА Новости –ին։

Ըստ Reuters-ի, կիրակի օրը երեկոյան այս երկրաշարժերի հետևանքով մահացել է մոտ 300 մարդ, ևս 5000 մարդ վիրավորվել է:
Գավառի իշխանություններին հաջողվել է պարզել մահացածների միայն կեսի ինքնությունը՝ նշելով, որ տեղի բնակիչները, հավատարիմ մնալով մահմեդական ավանդույթներին, թաղում են մահացածներին մինչև մայրամուտը՝ չսպասելով, որպեզի ոստիկանությունը պարզի նրանց ինքնությունը։

Հիշեցնենք, որ առավելագույնս երկրաշարժերից տուժել են գավառի գլխավոր՝ Թավրիզ քաղաքի շրջակա տարածքները։ Օգօոստոսի 11-ին այս տարածքներում գրանցվել էր 6,2 մագնիտուդ հզորությամբ 2 երկրաշարժ և 50 հետցնցում։

Նշենք նաև, որ ուժգին երկրաշարժերը հազվադեպ չեն Իրանում։ Դրանք տեղի են ունենում երկրի սեյսմիկ ակտիվ շրջաններում գրեթե ամեն տարի, որոնցից առավել ավերիչ հետևանքներ ունեցան 1990-ին և 2003-ին տեղի ունեցած երկրաշարժերը, երբ մահացավ 33 և 35 հազար մարդ համապատասխանաբար։