Այն կեղտոտ, անմակարդակ արշավը, որ սկսվել է Հայ առաքելական եկեղեցու հանդեպ, կասեցնել է պետք․ ԲՀԿ

Ես կարծում եմ, որ մենք, առնվազն, նվազագույն հարգանք պետք է ունենանք հոգևոր և պետական ինստիտուտների նկատմամբ։ Մեզ համար քննարկելի չէ Վեհափառի կոչը, դրա հասցեատերը դատարանն է և նա կորոշի՝ ինչպես վերաբերվի Վեհափառի հայտարարությանը։ Այս մասին այսօր ճեպազրույցում ասաց ԲՀԿ պատգամավոր Նաիրա Զոհրաբյանն՝ անդրադառնալով Վեհափառի հասցեին հնչեցված վիրավորանքներին։ «Այն կեղտոտ, անմակարդակ արշավը, որ սկսվել է Հայ առաքելական եկեղեցու հանդեպ, կասեցնել է պետք։ Ես մնում եմ իմ համոզմանը, որ ատելության խոսքը հնարավոր չի լինելու օրենսդրական որևէ նախագծով կարգավորել։ Յուրքանաչյուրիս համար պետք է լինեն կարմիր գծեր, որոնց անդին պետք է որևէ մեկը չանցնի»,-ասաց Զոհրաբյանը։ Անդրադառնալով նույն հարցին՝ Միքայել Մելքումյանն ասաց․ «Մենք ուր ենք գնում, մենք գնում ենք նրան, որ քրիստոնեական արժեքները, ընտանիքի արժեքը, որոնք եկել են դարերի ընթացքում, մի վայրկյանում կոտրենք։ Մենք պետք է  գնանք նրան, որ պետությունը պետք է կատարի իր պետականաշինական քաղաքականությունը, եկեղեցին էլ իր քաղաքականությանը, չէ, որ այդ ամենը ծառայեցվում է ժողովրդի շահի համար։ Անձնական վիրավորանքներ չպետք է լինեն, առավելևս, երբ դա վերաբերվում է իստիտուցիոնալ կառույցներին»։